SALMOS 50 - Dios Rimashca Shimicunami

SALMO 50 Cai pachapi causajcuna imalla rurashcata ricuchijca Taita Diosmi

Asaf rurashca Salmomi.

¹ Taita Diosca dioscunapaj Diosmi. Mandaj Diosmari rimashca. Paimari cai pachapi causajcunataca inti llujshinmantapish, inti huashicunmantapish tandanacuchun cayashca.

² Tucuitaj alli sumaj Sionmantami Taita Diosca achijyachishca.

³ Ñucanchij Taita Diosca shamungami. Mana upajlla shamungachu. Ñaupajpica tucuchicuj ninahuan, muyundijtaca yallitaj jatun huairandij tamyahuanmi canga.

⁴ Jahuamantami jahua pachatapish, cai pachatapish pai agllashcacuna imalla rurashcata ricuchingapaj cashna cayanga:

⁵ “Jucha illaj ñucapaj cajcuna tandanacuichij. Ñucaman cushpa rupachishpa ñucahuan ari ninacujcuna tandanacuichij” ningami.

⁶ ¡Taita Dios juez cashcamanta paica cashcata rurashpami mandacun nishpami jahua pachaca huillanga! Selah

⁷ Paica cashnami ninga: “Ñuca agllashcacuna uyaichij. Cancunamanmi rimagrini. Israelcuna, uyaichij. Cancuna mana allita rurashcatami huillagrini. Ñucaca Taita Diosmi cani, cancunapaj Diosmi cani.

⁸ Cancuna ñucaman cushpa animalcunata rupachishcamantaca imata mana rimagrinichu. Ñuca ñaupajpi punllanta animalcunata ñucaman cushpa tucui rupachishcamantapish imata mana rimagrinichu.

⁹ Chashna cashpapish cambaj bizicunata cuchun mana mañanichu. Cambaj corralmanta c'ari chivocunata cuchunpish mana mañanichu.

¹⁰ Sachapi causaj tucui animalcunapish ñucapajmi. Lomacunapi causaj huaranga huaranga animalcunapish ñucapajmi.

¹¹ Sachapi tiyaj alasyuj animalcunatapish tucuitami rijsini. Tucui cai pacha animalcunapish ñucapajllatajmi.

¹² Ñucaca yaricaihuan cashpapish, mana canta ñucaman carai nimanchu. Cai pachapish, tucui chaipi imalla tiyajcunapish ñucapajmari.

¹³ ¿Ñucataca huagracunapaj aichata micunmi yuyanguichu? Mana cashpaca ¿c'ari chivocunapaj yahuarta ubyanmi yuyanguichu?

¹⁴ Animalcunata huañuchishpa cuj shinaca Taita Diosta alabayari. Jahua pachamanta cajman cuna tucushcacunataca pajtachiyari.

¹⁵ Llaqui punllapi cashpaca, ñucata mañangui. Ñucaca quishpichishami. Canpish ñucataca alli” ninguimi.

¹⁶ Ashtahuanpish mana allita rurajtaca Taita Diosca cashnami nin: “Ñuca mandashcacunahuan rimangapajca canca ¿imataj canguiyari? Ñucahuan ari ninacushca shimicunahuan imata rimanatapish mana charinguichu.

¹⁷ Ñuca cunajpipish canca p'iñaringuimi. Ñuca cunashcacunataca cambaj huashamanmi shitangui.

¹⁸ Shuhuata ricushpapish paihuanmi callparcangui. Huainayajcunahuanmi shuj yuyailla tucushpa purircangui.

¹⁹ Cambaj shimihuanca millaita rimanapimi satirishpa puringui. Cambaj c'alluca umanapimi amañarishca.

²⁰ Tiyarinapi tiyarishpaca cambaj huauquipaj contrami rimarcangui. Quiquin huauquitapish yangapimi churarcangui.

²¹ Tucui chaicunata rurajpipish ñucaca upalla carcanillami. Ñucataca can shinallataj cashcallatami yuyangui. Can millaita rurashcataca canman ricuchishpatajmi sinchita rimagrini.

²² Taita Diosta cungarishca cajcuna cunanca caita uyaichij, alli entendichij. Cancunata mirga mirgata rurangacamaca ama shuyaichijchu. Chaimantaca pi mana quishpichingachu.

²³ Animalcunata cunapaj randica cantashpa alabajmi ñucataca alli ninga”. Pai purina ñanta allichijmanmi Taita Dios quishpichina cashcataca ricuchisha.