SALMOS 5 - Dios Rimashca Shimicunami

SALMO 5 Dios huaquichichun chaupi punllapi mañanami

Flautapi tocanata alli yachaj cantachichun, David rurashca Salmomi.

¹ Mandaj Dioslla, ñuca rimashcata uyahuayari, shungu llujshishpa ñuca aij, nicujta ricuhuayari.

² Ñuca Jatun Mandajlla, ñuca Dioslla, caparishpa ñuca mañashcataca uyarapangui, canllatamari mañani.

³ Mandaj Dioslla, tutamantaman ñuca caparishcata uyarapangui. Tutamantaman canman mañashpa huillashcataca shuyaracushami.

⁴ Canca millaita ruranacunahuanca mana cushicuj Diosmi cangui. Chaimanta millaicunaca cambaj c'uchupica mana causai tucunchu.

⁵ Jatun tucushcacunatapish cambaj ñaupajpica, mana ricunachinguichu. Millaita rurajcunatapish, tucuicunatami p'iñangui.

⁶ Llullashpa rimajcunatapish chingachinguimi. Huañuchijcunatapish, umajcunatapish Mandaj Diosca millanachinmi.

⁷ Ashtahuanpish ñucaca can yallitaj llaquij cajpimi cambaj huasimanca yaicuni. Cambaj huasi ladoman ñahuita churashpami, tucui shunguhuan canta adorani.

⁸ Mandaj Dioslla, ñucata p'iñajcuna ama juchachichun cambaj cashcata ruranahuan pushahuai. Cambaj alli ñanpi pushahuai.

⁹ Paicunapaj shimipica imatapish cashcata rimanaca mana tiyanchu. Shungupipish millaihuan jundami. Paicunapaj tunguripish pambana jutcuta pascashca shinami, c'alluhuanca sumajta rimaj tucucujcunami.

¹⁰ Ñuca Dioslla, paicunataca llaquichiyari. Llaquichingapaj paicuna allichishcallapitaj urmachiyari. Cantamari c'ariyacuncuna. Paicuna yallitaj juchallishcamantaca anchuchishpa shitayari.

¹¹ Canpi shunguta churajcunaca tucuicuna cushicuchun. Paicunata mitsaj cashcamanta tucui paicunapaj causaipi cushicuihuan canta cantachuncuna. Cambaj shutita c'uyajcunaca canpi cushicuchun.

¹² Mandaj Dioslla, cashcata rurajcunamanca canmari allicunata cungui. Muyujta escudohuan pacaj shinami, cambaj c'uyaihuan muyuchingui.