SALMOS 49 - Dios Rimashca Shimicunami

SALMO 49 Imalla charishcacunapi shunguta churanaca yuyai illaj canami

Tonota alli yachaj cantachichun Corepaj huahuacuna rurashca Salmomi.

¹ Tucui gentecuna caita uyaichij. Tucui cai pachapi causajcuna uyaichij.

² Yangallami nishcacunapish, alli nishcacunapish, charijcunapish, huajchacunapish tucuicuna uyaichij.

³ Ñuca shimica alli yachaitami rimanga. Ñuca shungupi yuyashcaca alli yuyaimi.

⁴ Yuyachij shimicunataca ñuca rinrinhuanmi uyasha. Mana yachaipaj yachaitaca arpapi tocashpami huillasha.

⁵ Llaqui punllacuna shamujpipish ¿imamantataj manchasha? Ñucata p'iñajcuna millai yuyaicunahuan ñuca muyundijta cajpipish ¿imamantataj manchasha?

⁶ Paicuna charishcacunapi shunguta churajcuna, paicuna achcata charishcacunallapi shunguta churajcunaca jatun tucuncunami.

⁷ Paicunapuramantaca shujllapish ima chaicunahuanca paipaj huauquitaca mana quishpichingachu. Paita quishpichichunpish Taita Diosmanca mana pagai tucungachu.

⁸ Paipaj causaita quishpichingapajca mashna tiyashcapish mana pajtangachu. Chaicunahuanca manataj nunca quishpiringachu.

⁹ Huiñaita causanapaj imata paganaca mana tiyanchu. Mana ismushun nishpa imata paganaca mana tiyanchu.

¹⁰ Yachaisapacunapish huañunllatajmi. Yuyai illajcunapish chashnallatajmi chingarincuna. Rumi shungupish chashnallatajmi chingarin. Paicuna charishcacunaca shujtajcunapajllami saquirin.

¹¹ Paicunapaj yuyaipica, paicunapaj huasica huiñaipaj cashcatami yuyancuna. Paicuna causanaca huahua huahuapaj cashcatami yuyancuna. Allpatapish paicunapaj shutitami churancuna.

¹² Chashna cashpapish gentecunaca huiñaitaca mana alli nishca cangachu. Huiñaitaca mana cushicungachu. Chingarijlla animalcuna shinallatajmi.

¹³ Quiquinllapitaj shunguta churashpa purijcunaca chashnami tucuringacuna. Paicunapaj huahua huahuacunapish yaya mamacuna yuyashca shinallataj yuyashpami cushicuncuna. Selah

¹⁴ Canlla ovejacunata shinami seolman pushanga. Huañuimi paicunataca michinga. Ña pararijpica ima pandata mana rurajcunami mandanga. Paicuna sumaj cashcaca chingaringami. Paicuna causanaca seolmi canga.

¹⁵ Ashtahuanpish ñuca causaitaca Taita Diosmari seol chariracunmanta quishpichinga. Ñucataca paimari pushanga. Selah

¹⁶ Maijan achcata charij tucujpipish ama mancharichu. Sumaj charinacunata paipaj huasipi jundachijpipish ama mancharichu.

¹⁷ Huañushpaca imata mana apangachu. Paipaj sumaj cashcacunapish mana catishpa ringachu.

¹⁸ Causacushpaca pai quiquinllataj cushicucunimi niringami. Achcata charij cashcamanta alabashca cangachari.

¹⁹ Chashna cashpapish paipaj yayacunapaj huahua huahuacuna causacunllamantajmi yaicunga. Luztaca nunca mana ricungachu.

²⁰ Runaca manapish entendishpa yangalla jatun tucujca animalcuna shinallatajmi chingaringa.