SALMOS 48 - Dios Rimashca Shimicunami

SALMO 48 Sión urcu sumaj canami, yallitaj cushicunami

Corepaj huahuacuna rurashca cantana Salmomi.

¹ Mandaj Diosca jatunmari. Paipajlla urcupi, paipajlla pueblopi alabashca canamari.

² ¡Tucui llajtacuna cushicuna sumaj llajtaca Sión urcumari! Chai llajtaca janaj ladomanmari. ¡Yallitaj jatun mandajpaj pueblomari!

³ Pai mandashpa tiyana huasipica, paca tucuna Taita Diosmi chaipica tiyacun nishpa rijsishcami.

⁴ Cai pachapi jatun mandajcunaca tandanacurcacunami. Shamushpami caita pasarcacuna.

⁵ Taita Dios chashna cajta ricushpaca, mancharircacunami. Musparircacunami. Miticungapajmi utca callparcacuna.

⁶ Chaipica paicunataca manchaimi japirca. Nanaipish huachacuj huarmita shinami japirca.

⁷ Tarsismanta barcocunataca quiquinmi p'aquingui. Inti llujshinmanta huairata cachashpami p'aquingui.

⁸ Tucuita Mandaj Diospaj llajtapica ñucanchij uyashca shinallatatajmi ricunchij. Ñucanchij Taita Diospaj pueblopica ñucanchij uyashca shinallatatajmi ricunchij. ¡Taita Diosca huiñaita pi mana cuyuchipajtami chai llajtataca ruranga! Selah

⁹ Taita Dioslla quiquin llaquij cashcataca quiquinpaj huasipimi yuyarinchij.

¹⁰ Taita Dioslla, quiquinpaj shuti ima shina cashca shinallatajmi alabancuna. Inti llujshinmanta, inti huashicun llajtacunacamami quiquintaca alabancuna. Quiquinpaj alli ladopica cashcata ruranami junda.

¹¹ Quiquin cashcata rurashpa mandajpica Sión urcuca cushicungami. Judapaj ushushicunaca cushicungami.

¹² Sión muyundijpi purichij. Sión muyundijta shayarichij. Torrecunata yupaichij.

¹³ Canlla lado muyundij pircacunata alli ricuichij. Mandana huasicunatapish alli ricuichij. Shamuj punllacunapi huahua huahuacunaman parlangapaj alli ricuichij.

¹⁴ Taita Diosca, ñucanchij Taita Diosmi. Huiñaimanta huiñaicama caj Diosmi. Huañushca q'uipapish paillatajmi huiñaicama pushacungalla.