SALMOS 47 - Dios Rimashca Shimicunami

SALMO 47 Taita Diosca tucui cai pachata Jatun Mandajmi

Tonota alli yachaj cantachichun Corepaj huahuacuna rurashca Salmomi.

¹ Tucui gentecuna maquicunata cuyuchichigari. Jatun cushicuihuan caparishpa Taita Diostaca cantaichigari.

² Mandaj Taita Diosca jahua pacha Diosmi. Manchana Diosmi. Paica tucui cai pachata Jatun Mandajmi.

³ Paimi gentecunataca ñucanchij ucupi churanga. Llajtacunataca ñucanchij chaqui ucupimi churanga.

⁴ Paimari ñucanchij japina cashcata cungapajca agllarca. Pai c'uyashca Jacob cushicuna llajtatami cunga. Selah

⁵ ¡Mandaj Taita Diosca cushicushcacunahuanmi huichiyarca. Trompetacunapi tocashcacunahuanmi huichiyarca!

⁶ Cantaichij, Taita Diosta cantaichij. Cantaichij, ñucanchijta Jatun Mandajta cantaichij.

⁷ Taita Diosca tucui cai pachata Jatun Mandajmi. Alli yuyaihuan cantaichij.

⁸ Taita Diosca llajtacunata mandajmi. Taita Diosca jucha illaj paipaj tiyanapimi tiyarin.

⁹ Llajtacunata mandajcunaca tandanacurcacunami. Abrahampaj huahua huahuacunahuanmi Abrampaj huahua huahuacuna shinallataj tandanacurca.

¹⁰ Cai pachapica Taita Diospaj poderllami junda canga. Paillami yallitaj jatunyachishca canga.