SALMOS 46 - Dios Rimashca Shimicunami

SALMO 46 Taita Diosca ñucanchijpaj randi shayarij, ñucanchijpaj muyundij pircami

Tonota alli yachaj cantachichun, Corepaj huahuacuna rurashca Salmomi. Ñañujlla tonopi cantachichun rurashca Salmomi.

¹ Taita Diosca ñucanchijpaj randi shayarij, ñucanchijpaj muyundij pircami. Llaquicunapi ñucanchij cajpipish utca ayudajmi.

² Chaimanta allpa chujchujpipish mana manchashunchu. Urcucuna mama cucha chaupiman huashicujpipish mana manchashunchu.

³ Mama cucha manchanayajta huajiashpa, yacucuna mana jahuallata jataricujpi, urcucuna chujchujpipish mana manchashunchu. Selah

⁴ Taita Diospaj pueblotaca jatun yacumanta ricuj yacucunami cushichin. Chai puebloca jahua pachamanta Dios causana huasimi.

⁵ Taita Diosca chai pueblo chaupipimi. Pi mana cuyuchingachu. Taita Diosmi utca ayudanga.

⁶ Llajtacunaca caparingacunami. Mandanacunaca chujchungami. Taita Dios rimajpica cai pachaca yacuyarcami.

⁷ Tucuita Mandaj Diosca ñucanchijhuanmi, ñucanchij paca tucunaca Jacobpaj Taita Diosmi. Selah

⁸ Shamuichigari. Mandaj Dios imallata rurashcata ricuichigari. Paica cai pachapica, mancharinacunatami rurashca.

⁹ Paica tucui cai pacha macanacuicunata tucuchijmi. Paica arcocunatapish p'aquijmi. Lanzacunatapish ñutujmi. Macanacuna carrocunatapish rupachijmi.

¹⁰ “Ña casijlla tucuichij, ñucataca Taita Dios cashcata rijsichij. Tucui llajtacuna alabashcami casha. Cai pachapi causajcuna jatunyachishcami casha”

¹¹ Tucuita Mandaj Diosca ñucanchijhuanmi. Paica ñucanchij paca tucuna Jacobpaj Taita Diosmi. Selah