SALMOS 44 - Dios Rimashca Shimicunami

SALMO 44 Llaquicunahuan cajpi quishpichishcapish, Diospajtaj cashcata ricunapaj llaquicunapish

Tonota alli yachaj cantachichun, sumaj shimicunata quillcanata yachaj Corepaj huahuacuna rurashca Salmomi.

¹ Taita Dioslla, ñaupa huatacunapi, ñaupa punllacunapica quiquinca allicunatamari rurashcangui. Chaitaca ñucanchij yayacunami parlarca. Ñucanchij rinrincunahuantajmi uyarcanchij.

² Llajtacunataca quiquinpaj maquihuanmi carcushpa cachashcangui. Gentecunataca llaquichishpami llujshichishpa cachashcangui. Chashna rurashpaca ñucanchij yayacunatami tarpuj shina cai llajtapi churashcangui.

³ Cai allpataca mana paicunapaj espadahuan macanacushpachu japishcacuna. Paicunapaj rigrapish mana mishachircachu. Ashtahuanpish quiquinpaj alli lado rigrahuan, quiquinpaj sumaj achij nicujhuanmi mishachishcangui. Paicunapi cushicuj cashcamantami chashna rurashcangui.

⁴ Taita Dioslla, quiquinca ñuca Jatun Mandajmi cangui. Jacobpaj huahuacunaman quishpirinata cachayari.

⁵ Quiquinhuanmi ñucanchijta p'iñajcunataca chaspishpa shitashun. Quiquinpaj shutipimi, ñucanchijta p'iñajcunataca sarushun.

⁶ Ñuca arcopica, mana shunguta churashachu. Ñuca espadapish mana quishpichingachu.

⁷ Ñucanchijta p'iñajcunamantaca quiquinmari quishpichircangui. Ñucanchijta millajcunataca pingaichircanguimi.

⁸ Ñucanchijca Taita Dioshuanmari tucui causaipi cushicushun. Quiquinpaj shutitaca huiñaitami alabashun. Selah

⁹ Ashtahuanpish ñucanchijtaca shitahuashcanguimari. Pingaichishcanguimari. Ñucanchij soldadocunahuanca ña mana llujshinguichu.

¹⁰ Ñucanchijtaca ñucanchijta p'iñajcunapaj ñaupajmanta manchashpa tigrachunmi saquishcangui. Ñucanchijta millajcuna ñucanchij charishcacunata paicunapaj apachunmi saquishcangui.

¹¹ Huañuchijcunapaj maquipi ovejata churaj shinami paicunapaj maquipi churashcangui. Shujtaj llajtacunamanmi caita chaita cachashcangui.

¹² Quiquin agllashcacunataca, imata mana japishpami c'atushcangui. Caimi valin, chaimi valin mana nishcanguichu.

¹³ Ñucanchij c'uchullapi causajcuna yanganchishpa yuyarishcapi parlanacucunallapimi churashcangui. Ñucanchij muyundijpi causajcuna chanzata rurashpa asinatamari rurashcangui.

¹⁴ Shujtaj llajtacuna ñucanchijmanta yuyachij shimicunata rimashpa asina cachunmi churashcangui. Ñucanchijta ricujcunaca tucuicunami umata cuyuchishpa asincuna.

¹⁵ Punllantami pingai tucucunilla. Musparinacunamari ñahuita tapacunlla.

¹⁶ Ñucata p'iñajcuna juchachishpa yanganchishcacunamari ñucataca yangapi churan. Ñucata p'iñajcuna paicunapish llaquichishun nicushcamantami chashna llaquilla cani.

¹⁷ Tucui cai llaquicunami shamushca. Shina cajpipish quiquintaca mana cungarishcanchijchu. Quiquinhuan ari ninacushcatapish mana p'aquishcanchijchu.

¹⁸ Ñucanchij shungupish mana huashaman tigrarishcachu. Ñucanchij chaquicunapish quiquinpaj ñanmantaca mana anchurishcachu.

¹⁹ ¿Ima nishpataj chacalcuna causanaman shitanguiyari? ¿Ima nishpataj huañunalla amsahuan tapanguiyari?

²⁰ Ñucanchij Taita Diospaj shutita cungarishca cajpi, mana cashpaca shujtaj diosman maquita chutashpa adorashca cajpica,

²¹ Taita Diosca ¿maitataj mana yachanman carcari? Paica shungupi pacalla cajcunatapish yachanmi.

²² Ashtahuanpish quiquinpaj cashcamantamari, tucui punlla ñucataca huañuchincuna. Huañuchinapajmi nishca ovejacuna shinami canchij.

²³ Jatun Dioslla, rijchariyari. ¿Ima nishpataj dormicunguilla? Rijchari ama huiñaipaj caruyaichu.

²⁴ Ñucanchijta llaquichicujpi, ñucanchij llaquihuan cajpica ¿ima nishpataj cungaringuiyari? Quiquinpaj ñahuitaca ¿ima nishpataj pacahuanguiyari?

²⁵ Ñucanchij almaca llaquicunahuanca ñutu allpapi urmashca shinamari. Ñucanchij cuerpoca pambapi sirijta aisashcamari.

²⁶ ¡Ñucanchijta ayudangapaj jatariyari. Quiquinpaj llaquij cashcahuan quishpichihuayari!