SALMOS 43 - Dios Rimashca Shimicunami

SALMO 43 Llaquichicunmanta mitsashpa cacharichichun mañashcami

¹ Taita Dioslla, ima shina cajta ricushpa, ñucata llaquichicunmanta mitsahuayari. Diosta mana rijsijcunamanta quishpichihuayari. Umaj runamanta, millai runamanta quishpichihuayari.

² Quiquinca ñuca Diosmi cangui. Muyundij ñuca pircami cangui. ¿Ima nishpataj shitahuarcanguiyari? ¿Ima nishpataj llaquilla cashcata ricuchij churanata churashca purina carcaniyari? ¿Ima nishpataj ñucata p'iñajcuna llaquichishca cana carcaniyari?

³ Quiquinpaj luzta cachahuayari. Quiquinpaj shimita cachahuayari. Chaicunami ñucataca pushanga. Quiquinpajlla urcuman, quiquin causana huasimanmi pushanga.

⁴ Taita Diospaj altarmanmi c'uchuyasha. Ñuca llaquita anchuchij, ñucata cushichij Taita Diospajmanmi c'uchuyasha. Taita Dioslla, ñuca Dioslla arpapi tocashpami quiquintaca alabasha.

⁵ Ñuca almalla ¿ima nishpataj shaicuringuiyari? ¿Ima nishpataj ñuca ucupica yallitaj muspachinguiyari? Taita Diosta shuyailla. Paitaca alabasharajmi. Paica ñucata quishpichijmi. Ñuca Diosmi.