SALMOS 40 - Dios Rimashca Shimicunami

SALMO 40 Jahua pacha Dios llaquimanta llujshichijpi paita alabashcami

Tonota alli yachaj cantachichun, David rurashca Salmomi.

¹ Mana p'iñarishpallami Mandaj Diosta shuyacurcanilla. Paica jahuamanta cumurishpami, ñuca caparishcata uyarca.

² Manataj llujshipaj jutcumantami llujshichichircangui. Manataj llujshipaj guzumantami llujshichichircangui. Ñuca chaquicunatapish yacu rumi jahuapimi churarca. Ñuca purina ñantapish allichircami.

³ Chai q'uipaca ñuca shimipica mushuj cantotami churarca. Ñucanchij Diosta alabachunmi churarca. Achcacunami chaita ricungacuna. Mancharingacunami. Mandaj Diosllapimi shunguta churangacuna.

⁴ Mandaj Diosllapi shunguta churajca cushichishcami. Jatun tucushcacunataca mana ricunachinchu. Llullata catishpa pandata rijcunatapish mana ricunachinchu.

⁵ Ñuca Mandaj Dioslla, mancharinacunata quiquin rurashcaca ashtahuan ashtahuanmari mirashca. Ñucanchijpaj allita rurana yuyaillami cangui. Can rurashca allicunaca mana yupai tucuipajmari. Can imalla allicunata rurashcata yupashpa huillasha nishpapish, mana tucuita yupashpa huillai tucunichu.

⁶ Sacrificiocunata cushcapish, ofrendata cushcapish mana quiquin munashca shinachu. Ñuca rinrincunatapish pascashcanguimi. Diosman cushpa tucui rupachinatapish, juchamanta cunatapish mana mañashcanguichu.

⁷ Chaimi cashna nircani: “Carapi quillcashpa pillushca libropi ñucamanta huillacushca shinallataj caipimi cani.

⁸ Ñuca Dioslla, ñuca cushicunaca quiquinpaj munaita ruranami. Quiquin mandashcaca ñuca shungu ucupimari” nircanimi.

⁹ Quiquinca cashcata ruraj cashcataca, jatun tandanacuipimi huillarcani. Mandaj Dioslla, ñuca mana upajlla saquirishcataca quiquinllataj yachanguimi.

¹⁰ Quiquin cashcata ruraj cashcataca, ñuca shungu ucullapi mana pacarcanichu. Quiquinca pajtachij cashcata, quiquinca quishpichij cashcataca tucuicunamanmi huillarcani. Quiquinca llaquij cashcata, mana llullaj cashcataca mana pacarcanichu. Jatun tandanacuipimi huillarcani.

¹¹ Mandaj Dioslla ñucata llaquinataca amataj saquihuaichu. Quiquin llaquij cashcahuan, mana llullaj cashcahuan tucui causaipi huaquichihuangui.

¹² Ñucataca mana yupaipaj llaquicunami muyunchishca. Millaita ñuca rurashcacunallatajmi ñucapica yallitaj jundashca. Huichillapish mana ricui tucunichu. Ñuca uma ajchatapish yalli achcamari mirarishca. Ñuca shungupish ña mana alli p'ucunchu.

¹³ Mandaj Dioslla, ñucata quishpichihuayari. Mandaj Dioslla ñucata ayudanaman utca shamuyari.

¹⁴ Ñucata huañuchishpa chingachingapaj mashcajcunaca pingachishca cachun, muspachishca cachun. Ñucata llaqui tucushca cachun nicujcunataca huashaman tigrachishca cachun. Pingachishca cachun.

¹⁵ Ñucata jajai, jajai nijcunaca, pingai tucushca shitashca saquirishca cachun.

¹⁶ Tucui quiquinta mashcajcunaca quiquinpi cushicuchun, yallitaj cushicuchun. Mandaj Dios quishpichichun mashcajcunaca: “Mandaj Diosca Jatunyachishca cachun” ninataca amataj upallachuncuna.

¹⁷ Ñuca llaquilla cajpipish, Mandaj Diosmi ñucataca yuyaringa. Ima illajlla cajpipish paimi ñucataca yuyaringa. Quiquinca ñucata ayudaj, ñucata quishpichijmi cangui. Ñuca Dioslla ama uniyaichu.