SALMOS 4 - Dios Rimashca Shimicunami

SALMO 4 Mandaj Diospi shunguta churashpa chishicuna mañanami

Tocanapi alli yachaj cantachichun, David rurashca Salmomi.

¹ Ñucapaj cashcata ruraj ñuca Dioslla, ñuca mañashcata uyahuayari. Canmari llaquihuan ñuca cajpica, samachihuarcangui. Ñucata llaquihuayari, ñuca mañashcata uyahuayari.

² Huañujlla runacuna, ¿maicamataj ñucata yangachinata saquishpa, ñucallatataj alli ninguichigari? Mana alli canallatamari c'uyanguichij, llullanallatamari mashcanguichij. Selah

³ Mandaj Diosca, imatapish chaitataj ruraj cajpi paipajlla cachun agllaj cashcata yachaichij. Paita ñuca mañajpica uyangami.

⁴ Juchata ruranataca manchaichij. Camapi cashpa cancunapaj shungupi ima shina cashcataca upajlla alli yuyarichij. Selah

⁵ Mandaj Diosmanca pai munashca shina sacrificiota cuichigari. Paillapi shunguta churaichigari.

⁶ Achcacunamari: “¿Pitaj allicunata rurashpa ricuchingari?” nincuna. Mandaj Dioslla, cambaj achijyachij ñahuita ñucanchijman ricuchihuayari.

⁷ Granotapish, llullu vinotapish charijcunaca achcatami cushicuncuna. Mandaj Dioslla ñucataca paicuna cushicushcatapish yallitami cushichingui.

⁸ Mandaj Dioslla canca canpi shunguta churashpami causachingui. Chaimanta sumajtami dormij siririni, sumajtami dormini.