SALMOS 39 - Dios Rimashca Shimicunami

SALMO 39 Runapaj causaica utca tucurijllami

Tonota alli yachaj Jedutún cantachichun, David rurashca Salmomi.

¹ Ñucaca: “Ñuca c'alluhuan ama juchallingapajca, alli yuyaihuan causanatami yachasha. Ñuca shimipi frenota churashpami jarcarisha. Diosta mana rijsijcuna ñuca ñaupajpi cajpimi chashna rurasha” nircanimi.

² Ñucaca shimi mana llujshij shina tucushpami upajlla saquirircani. Allita rimana cajpipish mana shimi llujshircanichu. Ashtahuanpish ñuca nanaica ashtahuanmi anchayarca.

³ Ñuca shunguca, ñuca ucupica ruparircami. Ñuca yuyarinapica, ninami japirirca. Chaimi ñuca c'alluhuanca cashna nircani:

⁴ “Mandaj Dioslla, ñuca causai tucurinata huillahuayari. Mai punllacunacama causanata huillahuayari. Ñuca ñalla tucurinata yachasha ninica.

⁵ Ñuca causana punllacunataca utca tucurinallatamari curcangui. Ñuca causaica quiquinpaj ñaupajpica ima mana canchu. Tucui runacunapaj causaica samaita aisana shinallamari. Selah

⁶ Alli ricujpica, runapaj causaica llandu shinallami. Imata chai yuyai rurashcapish yangallami. Charinacunataca montonanllami. Pi japina cashcatapish mana yachanchu.

⁷ Cunanca Jatun Dioslla, ¿imatataj shuyashari? Quiquinllapimi ñuca shunguta churani.

⁸ Juchata ruranamantaca llujshichihuayari. Ñucataca yuyai illajcuna chanzata rurana tucuchunca ama saquihuaichu.

⁹ Quiquinllataj rurasha nishcamanta ruracujpica, imata mana rimashpa, mana rimaj runa shina upajlla saquirircanillami.

¹⁰ Quiquin llaquichicushcataca ñucamanta anchuchihuayari. Quiquinpaj maquihuan huajtashcamantaca tucuricunimari.

¹¹ Runa juchallishcamantaca llaquichishpami allichingui. Pai yallitaj c'uyacushcataca polilla shinami tucuchingui. Runapaj causaica samai aisai shinallami. Selah

¹² Mandaj Dioslla, ñuca mañashcata uyahuayari. Ñuca caparishcata uyahuayari. Huacacujta ricushca jahuaca, ama upajlla saquiripaichu. Quiquinpajca shujtaj llajtamanta pasacuj shinallami cani. Ñuca ñaupa yayacuna shinallataj pasacujllami cani.

¹³ Cai pachamanta manaraj rishpa, manaraj chingarishpa ñuca ashahuan fuerzata japingapaj saquihuayari”.