SALMOS 37 - Dios Rimashca Shimicunami

SALMO 37 Millaicunapaj ñanmi

David rurashca Salmomi.

¹ Millaita rurajcunamantaca ama p'iñarichu. Millaita rurajcunapajtaca ama munaichu.

² Paicunaca q'uihuata shina utca p'itishcami cangacuna. Q'uihua shinami chaquiringacuna.

³ Mandaj Diospi shunguta churai, imatapish allita rurai. Quiquin llajtapimi causangui. Cashcata ruraj canahuan junda cai.

⁴ Mandaj Diosllahuan cushicui. Cambaj shungupi yuyashcataca paimi cunga.

⁵ Cambaj purinataca Mandaj Diosman mingai. Paillapi shunguta churai. Paica imatapish can munashcata rurangami.

⁶ Can cashcata ruraj cashcataca luzta shinami ricungacuna. Can cashcata ruraj cashcaca chaupi punlla shina achijllami canga.

⁷ Mandaj Diospaj ñaupajpi upalla cailla. Mandaj Diospi shunguta churashpa shuyailla. Millaita rurajcuna charijyajta ricushpa ama huañuricuichu. Millaita rurajcuna imata ruranata yuyaricujta ricushpa paicuna shina tucunata munashpa ama huañuricuichu.

⁸ P'iñarinata saqui. P'iñarinata cungari. Ima mana allita ruranataca ama chai yuyailla caichu.

⁹ Millaicunaca chingachishcami cangacuna. Ashtahuanpish Mandaj Diospi shunguta churajcunaca Dios cusha nishca llajtatami japingacuna.

¹⁰ Millaicunaca ñallami mana tiyanga. Paicuna tiyacushcapi ricujpica ña mana ricuringachu.

¹¹ Alli shungucunami, Dios cusha nishca allpataca japingacuna. Yallitaj sumaj causaipimi cushicungacuna.

¹² Millaicunaca cashcata rurajcunata llaquichinallatami yuyarinacuncuna. Manchanayajta cashturishpami p'iñancuna.

¹³ Jatun Diosca, millaita rurajtaca asingami. Millaita rurajpaj punlla ña chayamucushcamantami asinga.

¹⁴ Diosta mana rijsijcunaca huajchacunata huañuchingapajmi espadata llujshichin. Ima illajcunata huañuchingapajmi arcota chutaracuncuna. Ima pandata mana rurajcunata huañuchingapajmi chashna purincuna.

¹⁵ Millaita rurajpaj espadaca paipaj shungullapitajmi yaicunga. Paipaj arcopish p'aquiringallami.

¹⁶ Cashcata rurajpaj charishcaca ashalla cashpapish, juchayuj runacuna charishcatapish yallimi.

¹⁷ Diosta mana rijsijcunapaj rigracunataca p'aquishcami canga. Ashtahuanpish cashcata rurajcunataca, Mandaj Diosmi paipaj maquipi huaquichinga.

¹⁸ Ima pandata mana rurajcunataca, punllantami Mandaj Diosca huaquichinga. Paicunaman cushcacunaca huiñaipajmi tiyanga.

¹⁹ Llaqui punllacunapipish, pingai tucuchun mana saquingachu. Yaricai punllacunapipish huijsa pajtatami caranga.

²⁰ Ashtahuanpish Mandaj Diosta p'iñaj, mana rijsijcunaca chingachishcacunami canga. Mandaj Diosta p'iñajcunaca tucuchishcami canga. Carneropaj huira shinami yacuyangacuna. Cushni shinami chingaringacuna.

²¹ Diosta mana rijsijcunaca, piman imata mañashcatapish mana cutichinchu. Ashtahuanpish cashcata rurajca llaquijmi imatapish cujmi.

²² Mandaj Dios alli nishcacunallami Dios cusha nishca allpataca japingacuna. Ashtahuanpish Mandaj Dios mana alli nishcacunaca ñutuchishcacunami canga.

²³ Mandaj Diosca runapaj causaitaca, paipaj maquipimi charicun. Tucui imapipish pai munashca shinami pushacun.

²⁴ Urmashpapish mana chaipi saquiringachu. Paitaca Mandaj Diosmari paipaj maquimanta charicun.

²⁵ Ñucaca ñami yuyaj cani. Cashcata rurajta Dios shitashcataca, huambramantapacha cunancama manataj ricushcanichu. Cashcata rurajpajca paipaj huahua huahuapish micunata mañashpa purijtaca manataj ricushcanichu.

²⁶ Tucui paipaj causaipi llaquishpa imatapish mañachijmi. Paipaj huahua huahuacunaca bendicionpajmi.

²⁷ Millaita ruranamanta anchuri. Allita rurai. Huiñaitami causangui.

²⁸ Mandaj Diosca, ima pandata mana rurajtami c'uyan. Paipaj agllashcacunataca mana saquinchu. Paicunataca huiñaipajmi huaquichinga. Ashtahuanpish Diosta mana rijsijcunapaj huahuacunataca ñutuchingami.

²⁹ Cashcata rurajcunallami Dios cusha nishca llajtata japingacuna. Tucui causaipimi chai llajtapi causangacuna.

³⁰ Cashcata rurajca, yachaisapa cashcahuanmi riman. Paipaj c'alluca imatapish cashcatatajmi riman.

³¹ Paipaj shungupica Taita Dios mandashcacunami tiyan. Chaimanta paipaj chaquicunaca mana lluchcaringachu.

³² Diosta mana rijsijcunaca cashcata rurajcunataca, huashallami mashcan. Huañuchinatami yuyancuna.

³³ Shina cajpipish Mandaj Diosca, paicunapaj maquipi mana saquingachu. Juchachingapaj apajpipish llaquichichun mana saquingachu.

³⁴ Mandaj Diospi shunguta churailla. Paipaj ñanpi purilla. Paica jatun canapi churangami. Pai cusha nishca allpatapish cungami. Juchayujcunata ña ñutushca cajpimi, canca ricungui.

³⁵ Diosta mana rijsijtaca yallitaj jatun tucushcatami ricurcani. Verdijlla laurel yura shina yallitaj caita chaita mirarijtami ricurcani.

³⁶ Chashna cashpapish chingarircallami. Pai maipi cashcapica mana carcachu. Pai maipi cashcata mashcashpapish mana japircanichu.

³⁷ Tucuita allita rurajtaca yuyariyari. Cashcata rurajtaca ricuhuayari. Sumaj causaiyuj runapajca, q'uipataca cushicunami tiyanga.

³⁸ Millaita rurajcunaca tucuicunami shuj cutin ñutuchishca canga. Diosta mana rijsijcunapajca tucuripica, tucuita chingachishca canallami.

³⁹ Ashtahuanpish cashcata rurajcunataca, Mandaj Diosmari quishpichinga. Llaqui punllacunapica muyundij pirca shinami paica huaquichin.

⁴⁰ Mandaj Diosmi ayudanga. Paimi quishpichinga. Diosta mana rijsijcunapaj maquimantapish llujshichishpami quishpichinga. Paipi shunguta churashcamantami chashna ruranga.