SALMOS 36 - Dios Rimashca Shimicunami

SALMO 36 Taita Diosca llaquijmi

Tonota alli yachaj cantachichun, Mandaj Diospajta ruraj David rurashca Salmomi.

¹ Diosta mana rijsij millaita rurajta ricushpami ñuca shungupica: “Paipica Diosta manchanaca mana tiyanchu” nini.

² Paica alli nishcami cana cani yuyanmi. Pai millaita rurashcataca mana ricurinchu. Paipaj juchaca mana ricuringachu yuyanmi. Paitaca pi mana p'iñangachu yuyanmi.

³ Paipaj shimipica, millaita rimana, umanallami tiyan. Alli yuyaiyuj canata chingachishcami. Allita runatapish saquishcami.

⁴ Camapi cashpapish millaita ruranallatami yuyarin. Mana alli ñanllapi purinatami munan. Millaitaca mana p'iñanchu.

⁵ Mandaj Dios quiquinpaj llaquij cashcaca jahua pachacunacamami chayan. Quiquin pajtachij cashcaca p'uyucamami chayan.

⁶ Mandaj Dios quiquin cashcata ruraj cashcaca Diospaj urcucuna shinami. Quiquin llaquichinacunaca ucujta jutcu shinami. Mandaj Dioslla, runacunatapish quiquinmi huaquichingui. Animalcunatapish quiquinmi cuidangui.

⁷ ¡Taita Dioslla, quiquin llaquij cashcaca yallitaj sumajmari! Chaimantami huañujlla aichayujcunaca, quiquinpaj alas ucupi miticuncuna.

⁸ Quiquinpaj huasipi tiyajcunahuanmi mana nijta carangui. Quiquinpaj sumaj yacuta ubyachishpami cushichingui.

⁹ Causaita cuj pugyu yacuca quiquinpimi. Quiquinpaj luzpimi luzta ricui tucunchij.

¹⁰ Quiquinta rijsijcunamanca quiquin llaquij cashcata ricuchiyari. Ima pandata mana yuyaj shunguyujcunamanca quiquin cashcata ruraj cashcata ricuchiyari.

¹¹ Jatun tucushcacuna jaitachunca ama saquihuaichu. Diosta mana rijsijtaca maquita cuyuchichunllapish ama saquihuaichu.

¹² Millaita rurajcunataca chaipimari urmachishca. Manataj jatarichunmari urmachishca.