SALMOS 34 - Dios Rimashca Shimicunami

SALMO 34 Diosca cuidajmi

Abimelecpaj ñaupajpi loco shina tucujpimi Davidtaca llujshichishpa cacharca. Chaimanta rishpa David rurashca Salmomi.

¹ Mandaj Diostaca punllanta alli nicushallami. Ñuca shimihuan alabanataca, manataj upallashachu.

² Mandaj Diospimi ñuca almaca cushicunga. Mana jatun tucushcacuna caita uyashpaca cushicungacunami.

³ Mandaj Diostaca ñucahuan tucushpa jatunyachishunchigari. Paipaj shutitaca shuj shinalla tucushpa jatunyachishunchij.

⁴ Mandaj Diostami mashcarcani, paica ñucata uyahuarcami. Tucui ñuca manchaimantami ñucataca quishpichirca.

⁵ Mandaj Diosta chaparacujcunaca achijyachishcami carcacuna. Paicunapaj ñahuicunapish mana pingachishcachu carca.

⁶ Cai huajcha runaca caparircami, Mandaj Diosca uyarcami. Tucui paipaj llaquicunamantami quishpichirca.

⁷ Mandaj Diosta manchajcunataca, paipaj angelmi muyundijta cuidan. Paita manchajcunataca paipaj angelmi mitsan.

⁸ Mandaj Diosca alli shungumi. Munaichigari, ricuichigari. Mandaj Diospi shunguta churajcunaca cushichishcami.

⁹ Cancunaca Mandaj Diospajllami canguichij. Paita manchaichij. Paita manchajcunapajca ima mana illanchu.

¹⁰ Malta leoncunapish ima illaj tucunllami, yaricaihuan purinllami. Mandaj Diosta mashcajcunaca ima illajpish, yaricaihuanpish mana puringachu.

¹¹ Shamuichij huahuacuna, ñucata uyaichij. Cancunamanca Mandaj Diosta manchanatami yachachigrini.

¹² ¿Unita causasha ninguichu? ¿Cambaj causaipi cushicusha ninguichu?

¹³ Millaita rimaj c'allu canamanta huaquichiringui. Umaj shimi canamanta huaquichiringui.

¹⁴ Millaimanta anchuringui. Allita rurangui. Sumajta causanata mashcai, chashna canata ama saqui.

¹⁵ Mandaj Diospaj ñahuica cashcata rurajcunataca chaparacunmi. Paicuna caparishcata uyangapajpish uyaracunmi.

¹⁶ Mandaj Diosca millaita rurajcunataca p'iñanmi. Paicuna rurashcata pi ama yuyarichunmi, cai pachamanta paicunata chingachin.

¹⁷ Cashcata rurajcunaca Mandaj Diostami mañan. Mandaj Diospish paicunatami uyacun. Tucui paicunapaj llaquicunamantami quishpichin.

¹⁸ Mandaj Diosca shungupi llaquilla cajcunapaj c'uchullapimi. Espiritupi llaquilla cajcunata quishpichinmi.

¹⁹ Cashcata rurajcunapajca achca llaquicunami tiyan. Ashtahuanpish chai llaquicunamantaca Mandaj Diosmi quishpichin.

²⁰ Paipaj tullucunataca Mandaj Diosmi huaquichin. Paipajca shuj tullullapish mana p'aquiringachu.

²¹ Millaita rurajtaca, millaita rurashcallatajmi huañuchinga. Cashcata rurajta p'iñajcunaca llaquichinapajmi canga.

²² Mandaj Diosca paipajta rurajcunapaj causaitaca quishpichinmi. Tucui paipi shunguta churajcunaca, mana llaquichishca cangacunachu.