SALMOS 33 - Dios Rimashca Shimicunami

SALMO 33 Tucui ima tiyajta callarichijta, paipaj maquipi huaquichijta cantashcami

¹ Cashcata rurajcunaca, Mandaj Diospi cushicuichij. Jatunta cushicuichij. Imapi mana pandarijcuna cantashcaca sumajmi.

² Mandaj Diostaca, arpahuan alabaichij. Salteriohuan, chunga cuerdayuj tocanahuan Mandaj Diosta cantaichij.

³ Mushuj cantota cantaichij. Tononchishpa yallitaj cushicushpa cantaichij.

⁴ Mandaj Diospaj rimashca shimica mana pandachu. Pajtachij cashcataca, rurashcahuanmi ricuchin.

⁵ Mandaj Diosca cashcata ruranata, imatapish chashnataj cashcata ruranatami c'uyan. Mandaj Diospaj c'uyaica cai pacha jundami.

⁶ Mandaj Diosca rimashcallahuanmi jahua pachacunataca rurarca. Chaipi imalla tiyajcunatapish p'ucushpallami rurarca.

⁷ Paimi mama cucha yacutapish montonashpa charin. Ucujman huaquichinacunapi churashpami charin.

⁸ Allpapi causajcunaca tucuicuna Mandaj Diosta manchachun. Tucui cai pachapi causajcuna Mandaj Diospaj ñaupajpi chujchuchun.

⁹ Tucui imatapish tiyachun nijpica, tucuimi rurarirca. Pai mandajpica tucuimi tiyarca.

¹⁰ Diosta mana rijsij llajtacuna yuyarinacushcataca Mandaj Diosca chingachinmi. Llajtacunapi causajcuna millaita ruranata yuyarinacucujtaca muspachinmi.

¹¹ Mandaj Dios imallata rurasha nishcaca, huiñaita pajtacungallami. Paipaj shungupi imallata yuyarishcataca, huahua huahuacunapi ruracungallami.

¹² Mandaj Diosmi ñucanchij Diosca nij llajtaca cushichishcami. Mandaj Dios ch'icanchishcacunaca cushichishcami. Mandaj Diosca paicunataca paipajlla cachunmi ch'icanchirca.

¹³ Mandaj Diosca jahua pachamantami chapacun. Huañujlla aichayuj runacunataca tucuicunatami ricucun.

¹⁴ Pai causacunmantami tucuicunata chaparacun. Cai pachapi causajcunataca tucuicunatami ricuracun.

¹⁵ Tucui paicunapaj shungutaca paimi rurarca. Paicuna imallata rurashcatapish tucuitami ricuracun.

¹⁶ Pi jatun mandajpish, achca soldadocunata charishcallahuanca mana mishai tucunchu. C'ari c'ari runapish achca fuerzata charishcallamanta mana quishpiri tucunchu.

¹⁷ Caballocunaca mana quishpichinchu. Yallitaj fuerzayuj caballocunapish mana quishpichi tucunchu.

¹⁸ Mandaj Diosca paita manchajcunamantaca paipaj ñahuitaca mana anchuchinchu. Paipaj llaquij cashcapi shunguta churajcunamantaca paipaj ñahuitaca mana anchuchinchu.

¹⁹ Huañunallapi cajpipish quishpichingapajmi ricuracun. Yaricai punllacunapi huañucujpipish causaita cungapajmi ricuracun.

²⁰ Ñucanchijca Mandaj Diosllapimi shunguta churanchij. Paica ñucanchijta ayudaj, ñucanchij escudomari.

²¹ Paipaj jucha illaj shutipimi shunguta churashcanchij. Chaimanta ñucanchij shunguca paipimi cushicun.

²² Mandaj Dioslla, ñucanchijca quiquinpimi shunguta churanchij. Chai shinallataj quiquinpaj c'uyaica ñucanchij jahuapi cachun.