SALMOS 32 - Dios Rimashca Shimicunami

SALMO 32 Dios perdonashcaca cushicunmi

Cantanata yachachingapaj David rurashca Salmomi.

¹ Mana cazushcacunata perdonashcacuna, paicunapaj juchacunata tapachishcacunaca cushichishcami.

² Maijanpish ima umana yuyaita mana charijpica, paipica ima mana alli tiyashcata Mandaj Dios mana japishpaca paitaca cushichishcami canga.

³ Mandaj Diosman ñuca juchacunata mana huillashpaca, punllanta aij nicunillami. Ñuca tullucunaca maucayashpami catin.

⁴ Tutai punllami quiquinpaj maquica ñuca jahuapi ashtahuan ashtahuan llashashpa catin. Chaipica ñucaca verdijlla shina cashpapish, usya punllapi chaquirij shinami tucurcani. Selah

⁵ Mandaj Dios ñuca juchataca tucuitami quiquinman huillarcani. Millaita rurashcacunataca imata mana pacarcanichu. “Ñuca mana cazushcacunataca Mandaj Diosmanmi” huillarcani. Mandaj Dios, millaita rurashpa ñuca juchallishcataca perdonarcanguimi. Selah

⁶ Chaimantami quiquinpajlla cajcunaca manaraj llaquichijpi quiquintaca mañan. Chaimi jatun yacu jundai shina shamushpapish, paipajmanca mana chayanga.

⁷ Mandaj Dioslla quiquinca ñuca miticunami cangui. Ñuca llaquihuan cajpipish huaquichinguimi. Llaquimanta llujshishca cashpa cantana cantocunahuanmi ñucataca muyunchingui. Selah

⁸ Shina nijpi Mandaj Diosca: Can mai ñancunallata purinataca ñucami entendichisha, ñucami yachachisha. Ñuca ñahuitaca canmanta manataj anchuchishachu.

⁹ Ama caballo shina mana entendij caichu. Mula shina mana entendisha nij ama caichu. Chaicunallami anguhuan huatajpi, fierrota amullichijllapi cazuncuna. Mana chashna rurajpica cambajmanca mana c'uchuyangachu.

¹⁰ Mandaj Diosta mana manchajcunapajca achca nanaimi tiyanga. Mandaj Diospi shunguta churajcunapajca, Taita Diospaj llaquishcahuan muyunchishcami canga.

¹¹ Cashcata rurajcuna, Mandaj Diospi cushicuichij. Alli nishcacuna paillapi cushicuichij. Ima pandata mana ruraj shunguyujcuna cushicuihuan cantaichij.