SALMOS 3 - Dios Rimashca Shimicunami

SALMO 3 Mandaj Diospi shunguta churashpa tutamanta mañana shimicunami

Cai Salmoca David paipaj churi Absalonta miticushca cashpa quillcashcami.

¹ Mandaj Dioslla, ñucata p'iñajcunaca yallitaj achcacunami mirarishcacuna. Achcacunami ñucata llaquichingapaj jatarishcacuna.

² Achcacunami ñucamantaca: “Paitaca Taita Diosca mana quishpichingachu” nincuna. Selah

³ Ashtahuanpish can Mandaj Diosmi ñuca muyundijta escudo shina cangui. Canmi ñucata jatunyachingui, canmi ñucata jatarichingui.

⁴ Mandaj Diostaca ñuca shimihuan caparishpami mañarcani, paica paipajlla caj urcumantami cutichihuarca. Selah

⁵ Mandaj Dios ñucata cuidajpimi, dormij siririni, dormini, rijcharini.

⁶ Huaranga huarangacuna ñucata p'iñashpa muyunchijpipish mana manchashachu.

⁷ ¡Mandaj Dios, jatarihuayari! ¡Ñuca Dioslla, quishpichihuayari! canmi ñucata p'iñajcunataca quijaduspi chugrichircangui. Millaicunapaj quirucunatapish canmi p'aquircangui.

⁸ Quishpirinaca Mandaj Diosmantami shamun. Can agllashcacunamanca allicunata cuhuayari. Selah