SALMOS 29 - Dios Rimashca Shimicunami

SALMO 29 Mandaj Diosca tucuita rurai tucuj sumajmi

David rurashca Salmomi.

¹ Tucuita rurai tucujpaj churicuna, Mandaj Diosta alabaichij. Mandaj Diostaca sumajmari cangui, tucuita rurai tucujmari cangui nichij.

² Mandaj Diospaj shutitaca alabanataj cashcamanta alabaichij. Mandaj Diosca ima jucha illajpi cashcamanta adoraichij.

³ Mandaj Diospaj rimaica yacucuna jahuapimari uyarin. Tucuita rurai tucuj sumaj Taita Diosca c'ulun nishpamari uyarin. Mandaj Diosca achca yacucuna jahuapimari.

⁴ Mandaj Diospaj rimashcaca, tucuita rurai tucuj cashcahuanmi uyarin. Mandaj Diospaj rimashcaca sumajmari uyarin.

⁵ Mandaj Diospaj rimashcaca cedro yuracunata p'aquijmi. Mandaj Diosca Libanopi tiyaj cedro yuracunatapish p'aquijmi.

⁶ Líbano urcutaca bizicunata shinami saltachirca. Sirión urcutapish búfalo huagracunata shinami saltachirca.

⁷ Mandaj Dios rimashpaca lunyacuj ninatami shitan.

⁸ Mandaj Dios rimashcaca shitashca pambatami chujchuchin. Mandaj Dios rimashcaca Cades shitashca pambatami chujchuchin.

⁹ Mandaj Dios rimashcaca, encina yuracunapaj ramacunatami p'itin. Achca yuracunatapish lluchu caspillatami saquin. Paipaj huasipica tucuimi pai sumaj cashcata huillan.

¹⁰ Mandaj Diosca yacu juilluta mandajmi. Mandaj Diosca huiñaita mandashpami paipaj mandanapi tiyacun.

¹¹ Mandaj Diosca, paipaj cajcunamanca podertami cunga. Mandaj Diosca paipaj cajcunamanca sumaj causaihuanmi bendicianga.