SALMOS 28 - Dios Rimashca Shimicunami

SALMO 28 Ayudachun Diosta rogashpa mañajpi, Dios cutichijpi paita alabashcami

David rurashca Salmomi.

¹ Mandaj Dioslla, quiquintami caparini. Ñuca rumilla, ñuca mañashcataca ama mana uyasha nichu. Ñucata quiquin saquijpica huañushcacunata pambashcaman uriyacuj shinami casha.

² Quiquinta ñuca mañacushpaca quiquinpaj huasiman tigrarishpa maquicunata chutashpa rogashpa mañashcata uyahuai.

³ Millaicunahuan tandallaca ñucataca ama llaquichihuaichu. Millaita rurajcunahuan chagruca ama llaquichihuaichu. Paicunaca pihuanpish sumaj causaimantami rimaj tucuncuna. Ashtahuanpish paicunapaj shungupica millaitami yuyancuna.

⁴ Paicuna rurashca shinallataj llaquichi. Paicuna millaita rurashca shinallataj ñacachi. Paicuna rurashcamanta japinataca, paicunapaj maquihuan ima shina rurashca shinallataj llaquichi.

⁵ Tucui imapish Mandaj Dios rurashca cashcataca paicunaca mana yuyancunachu. Mandaj Diospaj maquihuan rurashca cashcataca mana yuyancunachu. Chaimanta paicunataca chingachingami. Cutinca mana shayachingachu.

⁶ Ñuca rogashpa mañashcata uyaj Mandaj Diosca alli nishca cachun.

⁷ Mandaj Diosca ñuca fuerzami, ñuca escudomi. Paipimi ñuca shunguta churani. Paimi ñucata ayudan. Ñucaca shungumantatajmi cushicuni. Ñuca cantohuanmi alabani.

⁸ Mandaj Diosca pai agllashcacuna paca tucuna pircami. Pai ch'icanchishca miticushpa quishpirinami.

⁹ Mandaj Dioslla, can agllashcacunataca quishpichihuayari. Quiquinpaj cajcunamanca allicunata cuhuayari. Paicunataca michihuayari, paicunamanca carapayari, huiñai huiñaita michihuayari.