SALMOS 27 - Dios Rimashca Shimicunami

SALMO 27 Mandaj Diosca ñucata achijyachij luzmi, quishpichijmi

David rurashca Salmomi.

¹ Mandaj Diosca ñucata achijyachij luzmi, ñucata quishpichijmi. Pitataj manchashari. Mandaj Diosca muyundijta pircashca shinami ñuca causaita huaquichin. Pita mana manchanichu.

² Millaicuna, ñucata llaquichijcuna, ñucata p'iñajcuna, ñucata llaquichingapaj tandanacushpapish, ñuca aichata micungapaj tandanacushpapish paicunarajmari tsagnarishpa urmarcacuna.

³ Achca soldadocuna ñucata llaquichingapaj tandanacujpipish, ñuca shunguca mana manchangachu. Ñucata llaquichingapaj macanacungapaj jatarijpipish, ñucaca Mandaj Diosllapimi shunguta churasha.

⁴ Mandaj Diostaca shuj mañanatami mañarcani. Tucui ñuca causaipi, paipaj huasipi causanatami mañarcani. Chaipica pai sumaj cashcatami alli alli yachasha nini. Paihuanmi parlanacusha nini. Chaitami mashcani.

⁵ Llaqui punllapica paimari paipaj carpa huasipi ñucataca pacanga. Pailla causana ch'icanchishca ucupimi ñucataca pacanga. Jatun rumi jahuapimi, ñucataca jahuaman churanga.

⁶ Ñucata p'iñaj muyunchishcacunapaj jahuapi cachunmi ñucataca mishachinga. Chaimanta cushicushpami paipaj carpa huasipi animalcunata cushpa huañuchisha. Tonocunahuanmi Mandaj Diosta cantashpa alabasha.

⁷ Mandaj Dioslla ñuca canta caparishpa mañashcata uyahuayari. Ñucataca llaquihuayari. Ñuca mañashcata cutichihuayari.

⁸ Ñuca shungupica: “Ñucata mashcai” ninguimari. Chaimanta Mandaj Dioslla ñucaca cantami mashcasha.

⁹ Quiquinpaj ñahuitaca ñucamantaca ama pacahuaichu. Cambajta rurajta p'iñashpa ama anchurichu. Quiquinca ñucata ayudajmari cangui. Ñucata quishpichij Taita Dioslla, ama saquihuaichu, ama shitahuaichu.

¹⁰ Ñuca yayapish ñuca mamapish ñucata shitajpica, Mandaj Diosmari marcashpa pushanga.

¹¹ Mandaj Dioslla, quiquinpaj ñanta rijsichihuayari. Ñucata p'iñajcuna ama juchachichun alli ñanta pushahuayari.

¹² Ñucata p'iñajcuna paicuna munashcata rurachun, ama paicunaman cuhuaichu. Ñucata huañuchingapajmi ñucata llullashpa huillangapaj jatarishcacuna. P'iñashpa llaquichingapajmi jatarishcacuna.

¹³ Cai pachapi causajcunapaj chaupipi Mandaj Diospaj c'uyaita ricunata mana crishca cashpaca, musparishpa chahuata huañuimanmi carcani.

¹⁴ Mandaj Diospi shunguta churai. Fuerzarishpa paita shuyailla. Mandaj Diospi shunguta churailla.