SALMOS 26 - Dios Rimashca Shimicunami

SALMO 26 Ima pandata mana rurashcanichu nishpa Diosman David huillashca shimicunami

David rurashca Salmomi.

¹ Mandaj Dioslla, ñuca ima shina cashcata ricuhuailla. Ñucaca ima juchachinata mana rurashpami purircani. Caita chaita mana yuyashpami Mandaj Diosllapi shunguta churarcani.

² Mandaj Dioslla, ñucataca callarishpa alli ricupailla. Quiquinpajtaj cashcatapish ricupailla. Ñuca tucui yuyaicunatapish, ñuca shungutapish shushushpa ricupailla.

³ Quiquinpaj llaquij cashcaca ñuca ñahuimantaca mana anchunchu. Chaimi quiquinpaj mana llullapi purini.

⁴ Mishqui shimi jayaj shungucunahuanca, mana tiyarircanichu. Ñahui ricuillapi alli tucushca purijcunapajmanca mana yaicushcanichu.

⁵ Millaicunapaj tandanacuitaca p'iñarcanimi. Diosta mana rijsijcunahuanpish manataj tiyarircanichu.

⁶ Ima mana allita mana rurashcapimi ñuca maquita maillani. Mandaj Dioslla chashna cashpami quiquinpaj altar muyundijpi purisha.

⁷ Pagui nishca tonohuan caparingapajmi chaipi casha. Mancharinacunata quiquin rurashcata parlangapajmi chaipi casha.

⁸ Mandaj Dioslla, can maipi causan huasitamari c'uyani. Quiquin sumaj achij nicujhuan causacun ucutapish c'uyanimi.

⁹ Juchayuj millaicunahuan huañuchun ama saquihuaichu. Huañuchij runacunahuan huañuchun ama saquihuaichu.

¹⁰ Paicunapaj maquicunapica millaimari junda. Alli maquica camaricunahuan jundami.

¹¹ Ashtahuanpish ñucaca imapi mana pandashpami purini. Ñucataca llaquihuayari, cacharichihuayari.

¹² Ñucaca sinchi allpapimi shayacuni. Tandanacushcacunapica Mandaj Diostami alli nishpa huillani.