SALMOS 25 - Dios Rimashca Shimicunami

SALMO 25 Juchacunata perdonashpa alli ñanta pushachun Diosta David mañashca shimicunami

David rurashca Salmomi.

¹ Mandaj Dioslla, ñucami quiquinta rogani.

² Ñuca Taita Dioslla, quiquinpimi shunguta churani. Ñuca pingai tucuchunca ama saquihuaichu. Ñucata p'iñajcuna cushicuchunca, ama saquihuaichu.

³ Quiquinpi shunguta churajca pi mana musparingachu. Quiquinta yangamanta c'ariyajllami pingachishca canga.

⁴ Mandaj Dioslla, quiquinpaj ñancunata ricuchihuayari. Quiquinpaj ñancunapi purinata yachachihuayari.

⁵ Quiquinpaj mana llullapi pushahuayari. Chaillata yachachihuayari. Quiquinca ñucata quishpichij Diosmi cangui. Punllanta quiquinllatami shuyani.

⁶ Mandaj Dioslla quiquinca c'uyaj cashcata, llaquij cashcata yuyaripayari. Quiquinpaj c'uyaj canaca, quiquinpaj llaquij canaca huiñaipajmari.

⁷ Huambraraj cashpa ñuca juchallishcata ama yuyaripangui. Huambraraj cashpa ñuca c'ariyashcacunata ama yuyaripangui. Quiquin llaquij cashca shinallataj ñucata yuyaripangui. Mandaj Dioslla, quiquin c'uyaj cashca shinallataj c'uyangui.

⁸ Mandaj Diosca alli, mana pandarijmi. Chaimanta juchayujcunataca, paimi alli ñanpi purinata yachachinga.

⁹ Mana jatun tucushcacunataca, paipaj cashcata ruranapi purinatami yachachinga. Alli shungucunataca, paipaj callpanapi callpanatami yachachinga.

¹⁰ Mandaj Dioshuan ari ninacushcata huaquichijcunapaj, pai ima shina cashcata ricuchishpa causajcunapajca, Mandaj Diospaj ñancunaca llaquij canahuan, mana llullahuan jundami.

¹¹ Ñuca juchaca yallitaj jatunmari. Mandaj Dioslla, quiquinpaj shutita c'uyashcamanta perdonahuai.

¹² ¿Pishi Mandaj Diosta manchaj runaca? Paita manchajtaca maijan ñanta agllanatami yachachin.

¹³ Taita Dios cushcacunapica paimi cushicunga. Paipaj huahua huahuacunami Dios cushca allpataca japinga.

¹⁴ Mandaj Diosca paita manchajcunahuanmi yallitaj apanacun. Paihuan ari ninacushcata pajtachinataca paicunamanmi yachachinga.

¹⁵ Mandaj Diosca ñuca chaquicunata linchimanta llujshichijmi. Chaimanta ñuca ñahuica Mandaj Diosllatami chaparan.

¹⁶ Mandaj Dioslla ñucallamari cani. Llaquicunahuan huañucunimari. Mandaj Dioslla, ricuhuayari llaquihuayari.

¹⁷ Ñuca shungupi llaquicunaca jahuanpi jahuanpimari mirarin. Chai llaquicunamantaca llujshichihuayari.

¹⁸ Llaquicunahuan ñuca cajta, shaicushca cajta ricuhuayari. Tucui ñuca juchacunata perdonahuai.

¹⁹ Ricuhuayari, ñucata p'iñajcunaca ima shinami mirarishca. Paicunaca yallitaj p'iñashpamari huañuchishun nicuncuna.

²⁰ Quiquinllapimari shunguta churani. Ñuca almata huaquichihuai, quishpichihuai. Pingaichishca cachun ama saquihuaichu.

²¹ Quiquinpi shunguta churashcamantaca ñuca cashcata ruraj cashca imapi mana pandaj cashca ñucataca huaquichichun.

²² Dioslla, israelcunataca cacharichihuayari. Tucui paicunapaj llaquicunamanta llujshichipayari.