SALMOS 24 - Dios Rimashca Shimicunami

SALMO 24 Achij nicujmanta Jatun Mandajmi

David rurashca Salmomi.

¹ Cai pacha allpaca Mandaj Diospajmi. Chaipi imalla tiyajcunapish paipajmi. Cai pachapi tucui imalla causajcunapish paipajmi.

² Paimari allpataca mama cucha jahuapi callarichirca, jatun yacucuna jahuapimari sinchita shayachirca.

³ Mandaj Diospaj urcumanca ¿pitaj huichiyangari? ¿Paipajlla huasipica pitaj cai tucungari?

⁴ ¡Maquicunata mana mapayachij, shungutapish mana mapayachij, manapish dios cajta mana adoraj, imata huillashpapish cashcata huillajllami chaimanca yaicui tucun!

⁵ Chashna alli runallami Mandaj Dios allicunata cushcataca chasquinga. Quishpichij Diosmantami cashcata ruraj canatapish, chasquinga.

⁶ Canta mashcajcunaca chashnallatajmi. Jacobpaj Taita Dioslla, quiquinpaj ñahuita ricusha nijcunaca chashnallatajmi. Selah

⁷ Pungucuna cancunapaj umacunata alzaichij. Huiñaita tiyaj pungucuna cancunapaj umacunata alzaichij. Achij nicuj Jatun Mandajmi yaicunga.

⁸ Chai achij nicuj Jatun Mandajca ¿pitagari? C'ari c'ari tucuita rurai tucuj Mandaj Diosmi. Paica tucuita rurai tucuj, tucuita mishaj Mandaj Diosmi.

⁹ Pungucuna cancunapaj umacunata alzaichij. Huiñaita tiyaj pungucuna cancunapaj umacunata alzaichij. Achij nicuj Jatun Mandajmi yaicunga.

¹⁰ Chai achij nicuj Jatun Mandajca ¿pitagari? Paica tucuita Mandaj Diosmi. Paica achij nicuj Jatun Mandajmi. Selah