SALMOS 21 - Dios Rimashca Shimicunami

SALMO 21 P'iñajcunapaj maquimanta quishpichishcamanta alabashpa cantashcami

Tonota alli yachaj cantachichun, David rurashca Salmomi.

¹ Mandaj Dioslla, jatun mandajca can tucuita rurai tucuj cashcapimi cushicun. Quiquin quishpichishcamantami cushicun.

² Paipaj shungu munashcatami cushcangui. Paipaj shimihuan mañashcataca mana mitsashcanguichu. Selah

³ Paita tupanamanmi llujshishcangui. Allicunata cunamanmi llujshishcangui. Paipaj umapipish ashtahuan alli curi coronatami churachishcangui.

⁴ Causaita mañajpipish cushcanguimi. Achca huatacunata huiñaita causachunmi cushcangui.

⁵ Quiquin Dios quishpichishcamantami paica alli nishca tucushca. Paipica alli nishca canata, jatun mandaj canatami churashcangui.

⁶ Huiñaipajmi alli nishcangui. Can quiquintaj paihuan cashcahuanmi paipica cushicuita jundachishcangui.

⁷ Chaimantami jatun mandajca Mandaj Diosllapi shunguta churan. Jahua pachamanta caj c'uyacujpica pi mana cuyuchingachu.

⁸ Quiquinta p'iñajcunataca quiquinpaj maquihuantajmi llaquichingui. Quiquinta mana ricunachijcunataca quiquinpaj alli maquihuanmi llaquichingui.

⁹ Quiquinpaj p'iñarina punllapica, nina hornopi churaj shinami llaquichingui. Mandaj Diosca pai yallitaj p'iñarina punllapica, nina lunyacujhuanmi tucuchinga.

¹⁰ Paicunapaj huahua huahuacuna ama mirachichun cai allpamanta chingachinguimi. Paicunapaj huahua huahuacunataca cai pachapi causajcunamantaca tucuimi chingachingui.

¹¹ Canta p'iñashpami yuyarinacurcacuna. Mana allita yuyarinacushcacunahuanca imatapish mana rurai tucungacunachu.

¹² Paicunataca quiquinmi miticujta cachangui. Cambaj arcopimi puntajlla caspita churangui. Chaihuanmi paicunapaj ñahuipi shitashpa cachangui.

¹³ Mandaj Dioslla, quiquin tucuita rurai tucuj cashcapi jatun cashcata ricuchiyari. Quiquintaca tucuita rurai tucujmi nishpa cantangapaj, alabangapaj.