SALMOS 2 - Dios Rimashca Shimicunami

SALMO 2 Mandaj Dios churashca mandajmi

¹ Llajtacunapi causajcunaca ¿ima nishpataj c'ariyashpa caparinacucuncuna? ¿Imamantashi manapish canata yuyarinacucuncuna?

² Cai allpapi caj jatun mandajcunapish jataringami. Mandajcunapish tandanacushpa jatarishpami, Mandaj Diostapish, pai churashca mandajtapish:

³ “Pai huatashcamanta cacharirishunchij, paipaj huascamanta cacharirishpa llujshishunchij” ningacuna.

⁴ Jahua pachapi causajca paicunatapish asingami, Jatun Diosca paicunatapish chanzata rurangami.

⁵ Chashna rurashpaca jatunta p'iñarishpami rimanga. Pai p'iñarishcahuanca muspachingami.

⁶ “Ñucapajlla caj Sión urcu jahuapi mandachunca ñuca churashca jatun mandajtami churarcani.”

⁷ Mandaj Dios ñucaman ima nishcatami huillagrini: “Paica ñuca huahuami cangui, cunanmi canmanca causaita cuni.

⁸ Ñucaman mañailla can japina cashcataca llajtacunatami cusha. Inti llujshinmanta, inti huashicuncama, tucui cai pachatami canman cusha.

⁹ Paicunataca fierro varahuan p'aquingui. Allpa mangata shina ñutungui” ninmi.

¹⁰ Cunanca jatun mandajcuna alli yuyaita japichij. Cai pacha juezcunapish ñuca cunashcata uyaichij.

¹¹ Mandaj Diospajtaca manchaihuan ruraichigari. Chujchushpa cushicuichigari.

¹² Pai p'iñarishpa cancunapaj causaita ama chingachichun paipaj churita alli nichij. Pai p'iñarishpaca mana saquingachu. Paipi shunguta churajcunaca cushichishcami canga.