SALMOS 19 - Dios Rimashca Shimicunami

SALMO 19 Mandaj Dios imallata rurashcapish, paipaj shimicunapish

Tonota alli yachaj cantachichun, David rurashca Salmomi.

¹ Cieloca Dios tucuita rurai tucuj cashcatami huillacun. Chaipi imalla tiyajpish paipaj maquihuan rurashcatami huillacun.

² Punllapish caishuj punllamanmi huillacun. Tutapish caishuj tutamanmi Mandaj Diospaj yachaita ricuchicun.

³ Shimicunapish, huillashcacunapish mana tiyanchu. Huillashpa rimashcapish mana uyarinchu.

⁴ Chashna cajpipish pai rimashcaca tucui allpatami chayarca. Paipaj shimicunaca tucui cai pachatami chayarca. Cielopimi intipaj carpa huasitapish shayachishca.

⁵ Cazaracuj novio bodata rurana huasimanta llujshij shinami intica llujshin. Jatun runa cushicucuj shinami cushicun. Chai runa paipaj ñanta callpaj shinami callpan.

⁶ Paipaj llujshinaca caishuj lado cielo c'uchumantami. Pai chayanaca caishuj lado cielo c'uchumanmi. Paipaj t'itaimantaca ¿pitaj miticungari?

⁷ Mandaj Dios mandashcaca ima mana pandachu. Ashtahuanpish almata mushujyachijmi. Ima shina causanata Mandaj Dios yachachishcaca chashnatajmi. Manaraj yachajtapish yachaisapata rurajmi.

⁸ Mandaj Dios mandashcacunaca mana pandachu. Ashtahuanpish shunguta cushichijmi. Mandaj Dios ima shina causachun nishcacunaca chuyami, ñahuicunatapish achijyachijmi.

⁹ Mandaj Diosta manchanaca ima mapa illajmi. Chaica canpi causacungallami. Mandaj Dios mandashcacunaca mana pandachu. Pai ima nishcapish chashnatajmi.

¹⁰ Curitapish yalli munanami. Allichishca curitapish yalli munanajllami. Sacha chuspipaj mishquitapish yalli mishquimi. Sacha chuspipaj mishqui yallitaj llujshicujmantapish yallimi.

¹¹ Cambajta rurajca chai shimicunahuan cunashcapishmi cani. Chaicunata cazujpajca, sumaj japinami tiyan.

¹² Mana allita rurashcataca ¿pitaj quiquinllatajca ricuri tucungari? Mana ricuri tucushca juchacunataca perdonapailla.

¹³ Cambajta rurajtaca jatun tucunamanta huaquichihuailla. Jatun tucuna yuyai ñucata cazuchichunca ama saquihuanguichu. Chashna rurajpica ima mapa illajmi casha. Yallitaj millaipish manataj tucushachu.

¹⁴ Ñuca rimashca shimicunaca quiquin munanalla cachun. Ñuca shungupi yuyarishcacunapish quiquinpaj ñaupajpi munanalla cachun. Mandaj Dioslla ñucata pacaj rumimi cangui. Ñucata quishpichijmi cangui.