SALMOS 17 - Dios Rimashca Shimicunami

SALMO 17 Millaicuna llaquichicujpi mitsachun Diosta mañashcami

Diosta David mañashcami.

¹ Mandaj Dioslla, uyahuayari cashcallatami mañani. Ñuca caparishcataca uyaracunguimi. Pita mana umaj shimihuan mañashcata uyahuayari.

² Ñucata mitsanaca canmanta shamuchun. Allita rurashcataca cambaj ñahuihuan ricuhuayari.

³ Canmi ñuca shungu ima shina cashcataca alli yachangui. Tutamari ricuj shamungui. Imapi pandarijta ricungapaj saquishpapish ima millaita rurajtaca mana japishcanguichu. Ñuca shimihuanca mana allitaca manataj rimashachu nishcanimi.

⁴ Gentecuna rurashca shinaca cambaj shimita yachashcamantami mana rurani. Millaicunata catina ñanmantaca huaquichirishcanimi.

⁵ Ñuca chaquicuna ama lluchcarichun, cambaj ñanpi sinchiyachishpa pushahuayari.

⁶ Ñuca Dioslla, canca ñuca mañashcata uyana cajpimi canta mañarcani. Rinrinta mañachishpa ñuca shimicunata uyahuayari.

⁷ Cambaj mancharina llaquij cashcata ricuchihuayari. Cambaj alli ladopi miticujcunataca canmi quishpichij cangui. Paicunata p'iñashpa jatarijcunamantami quishpichingui.

⁸ Cambaj ñahui angelta shina cuidahuayari. Cambaj alas llandushca ucullapi pacahuayari.

⁹ Ñucata llaquichij millaicunapaj ñahuimanta pacahuayari. Ñucata p'iñashpa huañuchingapaj mashcajcunamanta pacahuayari.

¹⁰ Chaicunaca huirahuan shina millai yuyaicunahuan pilluchishcami. Paicunaca jatun tucushca shimihuanmi imatapish rimarincuna.

¹¹ Ñucanchij purina ñantaca jarcachishcacunamari. Paicunaca allpapi urmachishpa shitangapajmari chaparacuncuna.

¹² León micunaihuan imata japingapaj chapacuj shinami. Malta león japinajlla tucushpa pacallamanta chapacuj shinami chapacun.

¹³ Mandaj Dioslla, jatariyari. Paicunata tupanaman llujshishpa urmachiyari. Millaicunamantaca cambaj espadahuan ñuca causaita quishpichiyari.

¹⁴ Mandaj Dioslla, chai runacunamantaca cambaj maquihuan quishpichiyari. Cai pachapajllata munaj runacunamanta quishpichiyari. Paicuna japinataca cai pachallapimi charincuna. Paicunaca can cushcataca huijsallapimi jundata charincuna. Paicunapaj huahuacunapish huijsallapimi sajsancuna. Cai pachapica q'uipa huahuacunapajpish puchuchinrajmi.

¹⁵ Ñucaca can cashcata rurajta rurashcamantami cambaj ñahuitaca ricusha. Ñuca dormicushcamantaca canman rijchaj jatarishpami cushicusha.