SALMOS 16 - Dios Rimashca Shimicunami

SALMO 16 Tucuimanta yalli herenciata agllashcami

David sumajta cantana cantomi.

¹ Jatun Dioslla, ñucataca huaquichihuayari. Canpimari shunguta churani.

² Ñuca almalla, Mandaj Diostaca cashnami nircangui: “Canca ñucata Mandajmi cangui, can illajllaca ñucapajca ima alli mana tiyanchu”.

³ Cai allpapi caj dioscunaca imatapish rurai tucunmi nincunami. Ñucaca cashcata rurajcunahuan cashpami cushicuni.

⁴ Shujtaj diosta adorangapaj callpashpa, chai dioscunapajta rurashcamantaca nanaicunami jahuanpi shamunga. Ñucaca chai diosmanca mana ima animalpaj yahuarta cushpa tallishachu. Chaicunaca diosmi ninatapish manataj nishachu.

⁵ Mandaj Dioslla canmantami tucuita charini. Canmi ñuca cushicuna cangui. Ñuca causaipish tucui imapish cambaj maquipimari.

⁶ Ñuca japina cashcata cungapaj cordelta shitajpica alli allpallatami rirca. Ñuca japina cashcaca tucuimanta yalli allimari urmashca.

⁷ Ñucata cunaj Mandaj Diostaca alli nicushallami. Tuta cajpipish ñuca yuyaita yachachicunguillami.

⁸ Ñucaca tucui imapipish Mandaj Diostami puntapi churani. Chaimanta pai ñuca alli ladopi cajpi, pi mana cuyuchingachu.

⁹ Chaimantami ñuca shunguhuan cushicuni, ñuca almahuan cushicuni. Ñuca cuerpopish ima manchai illajlla samaringallami.

¹⁰ Ñuca almataca Seolpica mana saquinguichu. Cambajlla caj ñuca aicha ismuchunpish mana saquinguichu.

¹¹ Ñucamanca causaiman apaj ñantami ricuchingui. Cambaj alli ladopica huiñaita sumajmari. Cambaj ñaupajpica cushicucunallami canga.