SALMOS 149 - Dios Rimashca Shimicunami

SALMO 149 Mandaj Diosta alabachun israelcunata rimashcami

¡Mandaj Diosta alabaichigari!

¹ Mandaj Diostaca mushuj cantohuan cantaichigari. Paitaca jucha illajcuna tandanacushcapi alabaichigari.

² Israelcuna, cancunata Ruraj Taita Dioshuan cushicuichigari. Siónpi causajcuna, cancunata Jatun Mandajhuan cushicuichigari.

³ Paipaj shutitaca tushushpa alabaichigari. Panderopi, arpapi tocashpa cantaichigari.

⁴ Mandaj Diosca paipaj cajcunahuanmi cushicun. Mana jatun tucushcacunata quishpichishpamari sumajyachinga.

⁵ Jucha illajcuna pai sumaj cashcamanta cushicuichigari. Cancunapaj camapi cashpapish cantaichigari.

⁶ Cancunapaj cungahuanca Taita Diosta jatunyachichigari. Cancunapaj maquipipish ishqui filoyuj espadata aisashca caichigari.

⁷ Shujtaj llajtacunata paicunatapish llaquichichingapaj aisashca caichigari. Shujtaj llajtacunapi causajcunata huanachingapaj aisashca caichigari.

⁸ Paicunapaj jatun mandajcunata grillo nishcacunahuan huatangapaj chashna caichigari. Paicunapaj alli nishcacunata fierro cadenacunahuan huatangapaj chashna caichigari.

⁹ Paicunata ima shina llaquichinata Taita Dios huillashca shina llaquichingapaj chashna caichigari. Tucui chaicunaca tucui jucha illajcunapajca jatunta cushicunami canga. ¡Mandaj Diosta alabaichigari!