SALMOS 148 - Dios Rimashca Shimicunami

SALMO 148 Mandaj Dios tucui rurashcacuna paita alabachun mandashcami

Mandaj Diosta alabaichigari.

¹ Jahua pachapi cajcuna, Mandaj Diosta alabaichigari. Jahuapi tiyajcuna, paita alabaichigari.

² Tucui paipaj angelcunapish alabaichigari. Tucui paipaj soldadocunapish alabaichigari.

³ Intipish, lunapish alabaichigari. Achij nicuj tucui luzerocunapish, alabaichigari.

⁴ Tucuita yalli jahuaman caj jahua pachacunapish alabaichigari. Jahua pachapi caj yacucunapish alabaichigari.

⁵ Mandaj Diospaj shutitaca alabaichigari. Pai mandajpimi tucui imapish rurarirca.

⁶ Tucui imatapish huiñai huiñaipaj cachunmi rurarca. Mana p'aquipaj mandashcatami churarca.

⁷ Mandaj Diostaca cai pachamanta alabaichigari. Mama cuchapi causaj manchanana animalcuna, ucujman caj yacucuna paita alabaichigari.

⁸ Taita Dios mandashcata ruraj rayopish, rundupish alabaichigari. Rasupish p'uyupish, jatun huairandij tamyapish alabaichigari.

⁹ Urcucunapish, tucui lomacunapish alabaichigari. Granota p'ucuj yuracunapish, tucui cedro yuracunapish alabaichigari.

¹⁰ Jatun animalcunapish, tucui laya animalcunapish, llucashpa purij animalcunapish, tucui pajarocunapish alabaichigari.

¹¹ Cai pacha mandajcunapish, tucui shujtajcunapish alabaichigari. Mandajcunapish, tucui cai pacha juezcunapish alabaichigari.

¹² Mosocunapish, solteracunapish, yuyajcunapish, uchilla huahuacunapish alabaichigari.

¹³ Mandaj Diospaj shutita alabaichigari. Paipaj shutillami jatunyachishca. Pai sumaj cashcaca cai pachapajpish, jahua pachapajpish jahuapimi.

¹⁴ Paimi paipaj cajcuna mandanataca jatunyachishca. Tucui jucha illajcuna, tucui israelcuna alabaichigari. Paipaj c'uchupi cajcuna alabaichigari. ¡Mandaj Diosta alabaichigari!