SALMOS 146 - Dios Rimashca Shimicunami

SALMO 146 Taita Diosca cashcata ruraj cashcamanta alabashcami

Mandaj Diosta alabaichigari.

¹ Ñuca almalla, Mandaj Diosta alabayari.

² Ñuca causaipica Mandaj Diostami alabasha. Ñuca causashcacamaca ñuca Taita Diostami salmocunata cantasha.

³ Mandajcunapica ama shunguta churaichu. Huañujlla runacunapipish ama shunguta churaichu. Paicunapica quishpirinaca mana tiyanchu.

⁴ Paipaj samai anchujpica allpaman tigranllami. Chai punllallatajmi pai imata yuyarishcacunapish chingarin.

⁵ Jacobpaj Taita Dios ayudashca runaca cushichishcami. Paica Mandaj Taita Diospimi shunguta churan.

⁶ Paimari jahua pachatapish, cai pachatapish rurarca. Mama cuchatapish, tucui chaipi imalla tiyajcunatapish paimari rurarca. Pai mana llullaj cashcataca huiñaipaj huaquichijmi.

⁷ Paica llaquichishcacunapaj cashcata rurajmi. Yaricaihuan cajcunaman carajmi. Mandaj Diosca prezu cajcunata cacharichijmi.

⁸ Mandaj Diosca mana ricujcunapaj ñahuita pascajmi. Mandaj Diosca urmashcacunata jatarichijmi. Mandaj Diosca cashcata rurajcunata c'uyajmi.

⁹ Mandaj Diosca caru llajtamanta cajcunata huaquichijmi. Yaya mama illajcunamanpish, viudacunamanpish ima illashcata cujmi. Millaicunapaj ñanta chingachijmi.

¹⁰ Mandaj Diosca huiñai huiñaitami mandanga. Sionlla, cambaj Diosca huahua huahuacunata mandangacungallami. ¡Mandaj Diosta alabaichigari!