SALMOS 143 - Dios Rimashca Shimicunami

SALMO 143 Llaquimanta llujshichichun, pai pushachun mañashcami

David rurashca Salmomi.

¹ Mandaj Dioslla, ñuca mañashcata uyahuayari. Ñuca rogarishcata uyahuayari. Quiquinca cashcata ruraj, pajtachij cashcamanta cutichihuayari.

² Quiquinpajta rurajtaca imallata rurashcata ricuchinaman ama yaicuichu. Quiquinpaj ñaupajpica, pi mana ima juchachina illajmi cani mana ni tucunchu.

³ Ñucata p'iñajca ñucataca catirashpamari llaquichishca. Ñuca causaitaca allpapimari sarushca. Ñucataca huañushcacunata shina amsapi causachunmari churashca.

⁴ Ñuca espirituca yallitaj llaquirishcami. Ñuca shunguca yallitaj llaquihuanmari.

⁵ Ñaupa huatacunaca ñucahuan ima shina cashcatami yuyarircani. Ñucapaj quiquin imallata rurashcacunatami alli alli yuyaricurcanilla. Quiquinpaj maquihuan rurashcacunatami alli alli yuyaricurcanilla.

⁶ Quiquinpajmanmi ñuca maquicunataca chutarcani. Ñuca almaca chaquishca allpa yacunaihuan caj shinami quiquinta shuyacun. Selah

⁷ Mandaj Dioslla, ñuca mañashcata utca cutichihuayari. Ñuca samaica ña taparigrinca. Ama quiquinpaj ñahuita ñucamanta anchuchihuaichu. Ñucata quiquin mana ricunaman shamujpica huañushcacunata pambashcaman uriyacujcuna shinami casha.

⁸ Quiquin ñucata llaquishcataca tutamantaman yachaj chayachiyari. Quiquinpimari ñuca shunguta churarcani. Ñuca maillata rina ñanta ricuchihuayari. Ñuca tucui ima yuyashcataca quiquinmanmari huillani.

⁹ Mandaj Dioslla, ñucata p'iñajcunamanta llujshichihuayari. Quiquinpimari ñucaca miticuni.

¹⁰ Quiquinca ñuca Taita Diosmi cangui. Quiquinpaj munaita ruranata yachachihuayari. Quiquinpaj alli Espiritullataj ñucataca ima pandata mana rurajcunapaj llajtaman pushachun.

¹¹ Mandaj Dioslla, quiquinpaj shutimanta ñucaman cutin fuerzata cuhuayari. Quiquin cashcata ruraj cashcamanta ñuca almataca llaquimanta llujshichihuai.

¹² Ñucaca quiquinpajta ruraj cashcamanta, quiquin ñucata llaquishcamanta, ñucata p'iñajcunataca chingachihuai. Ñucata huañuchisha nicujcunataca tucuicunata ñutuchihuai.