SALMOS 142 - Dios Rimashca Shimicunami

SALMO 142 Diospajtaj cashcata ricunapaj llaquicuna japijpi ayudachun Taita Diosta mañashcami

Shuj jatun jutcupi cashpa David Diosta mañashpa sumaj shimicunahuan cantashcami.

¹ Mandaj Diostaca caparishpami mañani. Mandaj Dios ñucata llaquichunmi caparishpa mañani.

² Ñuca llaquita apacushcataca paipaj ñaupajpimi ricuchini. Ñuca llaquicunataca paimanmi tucuita huillasha.

³ Ñuca shungu yallitaj llaquihuan huañucujpica quiquinmi ñuca maita rina ñantaca ricuchircangui. Ñuca purina ñanpica ñuca urmachunmi linchita pacashpa churarcacuna.

⁴ Ñuca alli ladota alli ricuyari. Chaita ricujca pi mana tiyanchu. Miticunatapish mana charinichu. Ñuca huañunamanta cuidajpish pi mana tiyanchu.

⁵ Mandaj Dioslla quiquintaca cashna nishpami mañarcani: “Quiquinllami ñuca shuyana cangui. Cai pachapi causajcunapurapica quiquinmi ñuca charina cangui” nircanimi.

⁶ Yallitaj llaquihuan cashpa ñuca mañashcata uyahuayari. Ñucata catirashpa llaquichijcunamanta llujshichihuayari. Paicunaca ñucata yalli c'ari c'aricunamari.

⁷ Ñuca almataca prezumanta llujshichihuayari. Quiquinpaj shutitami alabangapaj llujshichiyari. Ñucapajca quiquin ñuca charina cashcata ricushpaca, cashcata rurajcunami ñucataca muyunchingacuna.