SALMOS 141 - Dios Rimashca Shimicunami

SALMO 141 Millaimanta huaquichishca canapaj mañashcami

David rurashca Salmomi.

¹ Mandaj Dioslla, quiquintami caparini. Ñucapajman utca shamuyari. Quiquinta ñuca mañajpica mañanca uyaj cayari.

² Quiquinta ñuca mañashcaca incienso shina quiquinpaj ñaupajman chayashca cachun. Ñuca maquicunata huichi chutashcapish chishicuna quiquinman cuna cashcata cushca shina cachun.

³ Mandaj Dioslla, ñuca shimipica cuidajta churahuai. Ñuca shimiman ima mana alli ama llujshichun jarcajta rurahuai.

⁴ Millaita ruranata ñuca shungu cazuchunca ama saquihuaichu. Quiquinta mana rijsijcunahuan paicuna rurashca shina rurachunca ama saquihuaichu. Millaicunahuan chagrurishpa jatun micuipi paicunahuan micuchunpish ama saquihuaichu.

⁵ Cashcata ruraj ñucata llaquichishpaca, pai sinchita ñucata rimashcaca ñucapaj allipajmi canga. Ashtahuanpish quiquinta mana rijsijcunapaj aceitehuanca ñuca umapica amataj churashca cachun. Ashtahuanpish ñucaca paicuna millaita rurashcata mana ricunachishpa Taita Diosta mañacujllamari cani.

⁶ Paicunapaj juezcunataca jatun c'aca quinripi shitashcami canga. Chashna rurajpimi ñuca rimashcacunaca alli cashcata yachangacuna.

⁷ Yapushpa allpata chaupij shinami ñucanchij tullucunataca Seolpaj shimiman tsirapancuna.

⁸ Mandaj Dios, Jatun Dios ñuca ñahuicunaca quiquinllatami chaparacun. Ñucaca quiquinpimi shunguta churarcani. Ñuca almataca amataj saquihuaichu.

⁹ Ñuca urmachun churashca linchicunamanta huaquichihuayari. Millaita rurajcuna ima llaquipi churanamanta huaquichihuayari.

¹⁰ Quiquinta mana rijsijcunaca paicunapaj churashca linchillapitaj tucuicuna urmashca cachun. Ashtahuanpish ñucaca pasashpa ñaupajman rishallamari.