SALMOS 140 - Dios Rimashca Shimicunami

SALMO 140 Catirashpa llaquichijcunamanta huaquichichun rogashcami

Tonota alli yachaj cantachichun, David rurashca Salmomi.

¹ Mandaj Dioslla, millai runacunamanta llujshichihuayari. Yallitaj millai rurajcunamanta huaquichihuayari.

² Paicunapaj shungupica millaita ruranallatami yuyaricunllacuna. Paicunaca punllantami p'iñanacuillata churancuna.

³ Paicunapaj c'alluca culebrapaj c'allu shina puntasapamari. Paicunapaj shimi ucupica víbora culebrapaj venenomi tiyan. Selah

⁴ Mandaj Dioslla, quiquinta mana rijsijcunapaj maquipi urmanamanta huaquichihuayari. Ñucata urmachingapaj yuyarinacucuj yallitaj millai runacunamanta llujshichihuayari.

⁵ Jatun tucushcacunaca urmachingapajmari linchitapish, huascatapish ñuca ñanpi churashcacuna. Ñuca ñan c'uchupimari tsagnarishpa urmana huascata churashcacuna. Selah

⁶ Mandaj Diostaca cashnami nircani: Quiquinca ñuca Taita Diosmari cangui. Mandaj Dioslla ñuca rogarishpa mañashcata uyahuayari.

⁷ Mandaj Dios, Jatun Dios tucuita rurai tucuj ñucata quishpichijmi. Jatun macanacui punllapica ñuca umapaj c'ata tucushpami quishpichircangui.

⁸ Mandaj Dioslla, quiquinta mana rijsijcunapaj munaicunataca ama saquihuaichu. Paicuna yuyarishcacunahuan ñaupajman rishpa jatun tucuchunca ama saquihuaichu. Selah

⁹ Maipipish ñucata muyunchishpa llaqui tucushca canman nishpa paicunapaj shimihuan nishcacunaca paicunapaj uma jahuallapitaj urmashca cachun.

¹⁰ Paicunapaj jahuapica nina brazusmi urmanga. Paicunaca lunyacuj ninapi shitashcami cangacuna. Mana llujshi tucuipaj ucujta jatun jutcuman shitashcami cangacuna.

¹¹ C'allu cacharishca runaca cai allpapica mana sinchi cai tucungachu. Yallitaj millai runacunataca llaquimi tucui tucuchinga.

¹² Llaquichishca cajcunata pi mana mitsajpica, Mandaj Dios mitsana cashcata yachanimi. Ima illajlla cajcunata mitsaj cashcataca yachanimi.

¹³ Cashcata rurajcunallamari quiquinpaj shutitaca alabangacuna. Ima pandata mana rurajcunallamari quiquinpaj ñaupajpica causangacuna.