SALMOS 139 - Dios Rimashca Shimicunami

SALMO 139 Taita Diosca tucuipi cai tucujmi, tucuita yachajmi

Tonota alli yachaj cantachichun, David rurashca Salmomi.

¹ Mandaj Dios, ñucata allimi callarishpa ricungui. Allimi rijsingui.

² Ñuca tiyarijtapish, jatarijtapishmi ricucungui. Ñuca imallata yuyacujtaca carumantami yachangui.

³ Ñuca maillata purijtapish allimi ricuracungui. Samaricujpipish ricuracunguimi. Tucui ñuca ñancunatami quiquinca alli rijsingui.

⁴ Ñuca c'allu manaraj cuyurijpimi ñuca imallata rimanataca, Mandaj Diosca ña tucuita yachangui.

⁵ Ñuca huashatapish ñuca ñaupajtapish muyunchishcami cangui. Ñuca jahuapica quiquinpaj maquitami churashcangui.

⁶ Chashna yachashcaca ñucapajca yallitaj mancharinamari cangui. Yallitaj jatun yachaimari. Mana entendi tucunichu.

⁷ Quiquinpaj espiritumantaca ¿maipitaj paca tucushari? Quiquinpaj ñaupajmantaca ¿maipitaj miticui tucushari?

⁸ Jahua pachacunaman huichiyajpipish, chaipimi cangui. Seolman uriyajpipish, chaipimi cangui.

⁹ Intipaj alaspi jatarishpa rijpipish, mama cucha tucurinpi causagrijpipish,

¹⁰ quiquinpaj maquimi pushanga. Quiquinpaj alli maquimi ñucataca chariranga.

¹¹ Cashna nishachari: Amsatajca pacangami nijpipish, ñuca muyundijpica quiquinpaj ricuipica achijllallatajmari.

¹² Amsapipish quiquinpajca mana pacallachu. Tutapish quiquinpajca punlla shinallatajmi. Quiquinpajca amsapish, achijpish chai shinallatajmari.

¹³ Quiquinmi ñuca ucupi tiyajcunataca rurarcangui. Quiquinmi ñuca mamapaj huijsapipish huiñachircangui.

¹⁴ Quiquintami alabasha. Ñucaca yallitaj mancharinata rurashcami cashcani. Chaimantami alabasha. Tucui chaicunata quiquin rurashcacunaca mancharinamari. Chaitaca ñucaca tucuitami alli yachani.

¹⁵ Mamapaj huijsapi pacallapi huiñacushpapish quiquinpica ñuca cuerpoca mana pacallachu carca. Allpa ucujman shina pacalla huiñacushpapish quiquinpica mana pacallachu cashcani.

¹⁶ Mamapaj huijsapi tiyarishca pachamanta ñuca cuerpopi imalla tiyaj tucui ajushtaricujtami ricucurcangui. Chaicunataca ñuca manaraj tiyajpimi libropi quillcashcata ña charicurcangui. Chaitami ñuca cuerpopica shujllapish mana illajta tucuita churashcangui.

¹⁷ ¡Taita Dioslla, quiquinpaj yuyaicunaca ñucapajca tucuimanta yalli mancharinamari! ¡Tucui chaicunaca tucuimanta yalli jatun mana entendi tucuipajmari!

¹⁸ Chaicunata ñuca yupai callarijpica, t'iyu allpatapish yalli achcamari tucushpa catin. Rijcharishpapish, quiquinllahuantajmari cani.

¹⁹ Taita Dioslla, millai runataca huañuchiyari. Huañuchij runataca chashna ñucamanta anchuchiyari.

²⁰ Paicunaca c'amishpami quiquintaca rimancuna. Quiquinta p'iñajcunaca yangallami quiquinpaj shutipi rimancuna.

²¹ Mandaj Dioslla, ¿quiquinta p'iñajcunataca manachu p'iñani imatagari? Quiquinta p'iñajcunahuanca ¿manachu nina sindirij shina p'iñarini imatagari?

²² Paicunataca tucui shunguhuantajmi yallitaj p'iñani. Paicunataca ñucanchijta p'iñajcuna cashcatatajmi yuyani.

²³ Taita Dioslla, ñucataca alli alli ricuhuailla. Ñuca shungu ima shina cashcata rijsihuailla. Ñuca yuyaicuna ima shina cajta ricuhuayari, rijsihuayari.

²⁴ Ñuca ñanta ricupayari, ñataj mana alli canman. Huiñaita mana tucurij ñanpi pushahuayari.