SALMOS 138 - Dios Rimashca Shimicunami

SALMO 138 Mandaj Dios allita rurashcamanta pagui nishcami

David rurashca Salmomi.

¹ Ñuca tucui shunguhuanmi quiquintaca alabasha. Dioscunapaj ñaupajpimi quiquinta alli nishpa salmocunata cantasha.

² Quiquinpaj jucha illaj huasi ladomanmi cungurini. Quiquinca llaquij cashcamanta, imatapish pajtachijtaj cashcamantami quiquinpaj shutipi alabani. Tucui chaicuna jahuapica, quiquinpaj shutitapish, quiquinpaj shimitapishmi jatunyachishcangui.

³ Quiquinca ñuca mañancami uyangui. Ñuca almata sinchiyachishpami fuerzata cungui.

⁴ Mandaj Diostami alabangacuna. Tucui cai pacha jatun mandajcunami quiquintaca alabangacuna. Quiquin rimashcata uyashpami alabangacuna.

⁵ Mandaj Diospaj ñancunatami cantangacuna. Mandaj Diospaj sumaj cashcaca jatun cashcamantami cantangacuna.

⁶ Mandaj Diosca tucuita yalli jatunmi. Chashna cashpapish mana jatun tucushca mañashcatami uyaracun. Ashtahuanpish jatun tucushcataca carumanta ricucunllami.

⁷ Llaquicuna chaupipi cajpipish quiquinmi fuerzata cungui. Ñucata p'iñajcuna yallitaj p'iñarijpipish, quiquinpaj maquitami chutangui. Alli maquihuanmi quishpichingui.

⁸ Mandaj Diosca imallata ñucapi rurasha nicushcataca pajtachingami. Mandaj Dios quiquinpaj llaquij canaca huiñaipajmi. Quiquinpaj maquihuan rurashcataca ama shitanguichu.