SALMOS 136 - Dios Rimashca Shimicunami

SALMO 136 Mandaj Diospaj llaquij canaca huiñai huiñaita cashcamanta alabashcami

¹ Mandaj Diostaca alabaichigari, paica allimari. Pai llaquij canaca huiñaipajmari.

² Tucui dioscunapaj Diosta alabaichigari. Pai llaquij canaca huiñaipajmari.

³ Mandajcunapaj Jatun Diostaca alabaichigari. Pai llaquij canaca huiñaipajmari.

⁴ Jatun mancharinacunata rurajca paillamari. Paita alabaichigari. Pai llaquij canaca huiñaipajmari.

⁵ Paipaj yachaihuan jahua pachata rurajta alabaichigari. Pai llaquij canaca huiñaipajmari.

⁶ Cai pacha allpata yacu jahuapi churajta alabaichigari. Pai llaquij canaca huiñaipajmari.

⁷ Jatun achijyachijcunata rurajta alabaichigari. Pai llaquij canaca huiñaipajmari.

⁸ Intitaca punllata mandachunmi churashca. Chaita churajta alabaichigari. Pai llaquij canaca huiñaipajmari.

⁹ Lunata, luzerocunataca tutata mandachunmi churashca. Chaicunata rurajta alabaichigari. Pai llaquij canaca huiñaipajmari.

¹⁰ Egipciocunapaj punta churicunata huañuchijta alabaichigari. Pai llaquij canaca huiñaipajmari.

¹¹ Israelcunata egipciocunapaj chaupimanta llujshichijta alabaichigari. Pai llaquij canaca huiñaipajmari.

¹² Tucuita rurai tucuj paipaj maquihuan paipaj rigrahuan llujshichijta alabaichigari. Pai llaquij canaca huiñaipajmari.

¹³ Puca Cuchata ishquipi chaupijta alabaichigari. Pai llaquij canaca huiñaipajmari.

¹⁴ Israelcunata chai cucha chaupita ch'imbachijta alabaichigari. Pai llaquij canaca huiñaipajmari.

¹⁵ Faraontapish, paipaj soldadocunatapish Puca Cuchapimi pambarca. Paita alabaichigari. Pai llaquij canaca huiñaipajmari.

¹⁶ Paipaj cajcunata shitashca pambapi michijta alabaichigari. Pai llaquij canaca huiñaipajmari.

¹⁷ Jatun mandajcunata huañuchijta alabaichigari. Pai llaquij canaca huiñaipajmari.

¹⁸ Pi mana mishai tucuipaj jatun mandajcunata huañuchijta alabaichigari. Pai llaquij canaca huiñaipajmari.

¹⁹ Amorreocunata jatun mandaj Sehonta huañuchijta alabaichigari. Pai llaquij canaca huiñaipajmari.

²⁰ Basanta jatun mandaj Ogta huañuchijta alabaichigari. Pai llaquij canaca huiñaipajmari.

²¹ Chaicunapaj allpacunata israelcunaman cujta alabaichigari. Pai llaquij canaca huiñaipajmari.

²² Paipajta ruraj israelcunaman quiquin allpa cachun cujta alabaichigari. Pai llaquij canaca huiñaipajmari.

²³ Ñucanchij llaquihuan cajpipish ñucanchijta yuyarijta alabaichigari. Pai llaquij canaca huiñaipajmari.

²⁴ P'iñajcunapaj maquimanta ñucanchijta llujshichijta alabaichigari. Pai llaquij canaca huiñaipajmari.

²⁵ Tucui causaita charijcunaman micunata carajta alabaichigari. Pai llaquij canaca huiñaipajmari.

²⁶ Jahua pachapi causaj Taita Diosta alabaichigari. Pai llaquij canaca huiñaipajmari.