SALMOS 135 - Dios Rimashca Shimicunami

SALMO 135 Jatun Diosca jatunmi, rurashcalla dioscunaca yangallami

Mandaj Diosta alabaichigari.

¹ Mandaj Diospaj shutita alabaichigari. Mandaj Diospajta rurajcuna, paita alabaichigari.

² Mandaj Diospaj huasipi cajcuna paita alabaichigari. Ñucanchij Taita Diospaj huasi canllapi cajcuna alabaichigari.

³ Mandaj Diosta alabaichigari. Paica allimari. Paipaj shutitaca salmocunata cantashpa alabaichigari. Paica c'uyajmari.

⁴ Mandaj Diosmari Jacobtaca, paipaj cachun agllarca. Israelcunataca paipajlla cachunmari agllarca.

⁵ Mandaj Diosca jatunmari, chaitaca allitajmari yachani. Ñucanchij Jatun Diosca tucui dioscunata yallimari.

⁶ Mandaj Diosca tucui pai rurasha nishcatami ruran. Jahua pachapipish, cai pachapipish, mama cuchapipish, yacu ucujman cajcunapipish pai rurasha nishcatami ruran.

⁷ Paimari cai allpa tucurimanta p'uyutapish huichiyachin. Tamyapaj relampacunatapish paimari ruran. Huairatapish paimari huaquichishcamanta llujshichin.

⁸ Egipciocunapaj punta churicunataca paimari huañuchirca. Gentecunapaj punta churimanta callarishpa, animalpaj punta huacharishcacunacamami huañuchirca.

⁹ Egiptopica señalcunata, mancharinacunata rurashpami ricuchirca. Faraontapish tucui paipajta rurajcunatapish llaquichishpami chashna ricuchirca.

¹⁰ Achca llajtacunatapish chingachircami. Pi mana mishai tucuipaj jatun mandajcunatapish huañuchircami.

¹¹ Amorreocunata jatun mandaj Sehontapish, Basanta jatun mandaj Ogtapish huañuchircami. Canaanpi caj tucui jatun mandajcunatapish huañuchircami.

¹² Tucui chaicunapaj llajtacunataca paipaj israelcunamanmi curca. Paicuna quiquinpaj cachunmi paicunaman curca.

¹³ Mandaj Dioslla, quiquinpaj shutica huiñaipajmari. Mandaj Dioslla quiquintaca huahua huahuacunacama yuyaricungallamari.

¹⁴ Mandaj Diosmi paipaj cajcunataca ricunga. Paipajta rurajcunataca paimi llaquinga.

¹⁵ Llajtacunapaj dioscunaca cullquimanta, curimanta rurashcallami. Runacunapaj maquicunahuan rurashcallacunami.

¹⁶ Shimita charishpapish, mana rimancunachu. Ñahuita charishpapish, mana ricuncunachu.

¹⁷ Rinrinta charishpapish, mana uyancunachu. Paicunapaj shimipica samaipish mana tiyanchu.

¹⁸ Chaicunata rurajcunaca chaicunallamantaj rijchajcunami. Chai dioscunapi shunguta churajcunapish chaicuna shinallatajmi.

¹⁹ Tucui israelcuna, Mandaj Diostaca alli nichigari. Aaronpaj huahua huahuacuna, Mandaj Diostaca alli nichigari.

²⁰ Levipaj huahua huahuacuna, Mandaj Diostaca alli nichigari. Mandaj Diosta manchajcunapish Mandaj Diostaca alli nichigari.

²¹ Jerusalenpi causaj Mandaj Diostaca Sionmanta alli nichuncuna. ¡Mandaj Diosta alabaichigari!