SALMOS 133 - Dios Rimashca Shimicunami

SALMO 133 Huauquicunandij shina c'uyanacushcamanta cushichishcami

Huichiyacushpa David cantanami.

¹ Riquichij, ¡Huauquindijcuna tandalla, shuj shinalla causanaca yallitaj alli, yallitaj sumajmari!

² Aaronpaj umapi tucuimanta yalli alli aceiteta churajpi, paipaj barbasta uriyashpa, paipaj churana puntacama aceite shutucuj shinamari.

³ Hermón urcuta garhua shamushpa, Sión urcuman chayamuj shinamari. Chaimantami Mandaj Diosca ima allicunatapish, huiñai causaitapish cun.