SALMOS 128 - Dios Rimashca Shimicunami

SALMO 128 Mandaj Diosta manchajca cushicunmi

Huichiyacushpa cantanami.

¹ Tucui maijanpish Mandaj Diosta manchajca cushichishcami. Pai yachachishca shina causajca cushichishcami.

² Quiquin maquihuan trabajashcata micushpaca cushicunguimi. Imapipish allimi cangui.

³ Cambaj huarmipish uva yuracuna huasi muyundijpi alli granushca shinami canga. Cambaj huahuacunapish miza muyundijta, olivos yuracuna huiñacuj shinami canga.

⁴ Chashnamari Mandaj Diosca paita manchaj runamanca allicunata cunga.

⁵ Mandaj Diosca Sionmanta cantaca alli cashca cachun nichun. Chaimanta tucui cambaj causaipimi Jerusalén alli cashcataca canca ricungui.

⁶ Cambaj huahuacunapaj huahuacunatapish ricungacamami causangui. ¡Israelpica sumaj causai tiyashca cachun!