SALMOS 126 - Dios Rimashca Shimicunami

SALMO 126 Prezucunata tigrachishcata cantashcami

Huichiyacushpa cantanami.

¹ Mandaj Dios prezucunata Sionman tigrachijpica, muscuipi ricucushcata shinami yuyarcanchij.

² Chaipitajca ñucanchij shimihuanca yallitajmi asircanchij. Ñucanchij c'alluhuanca yallitajmi cantarcanchij. Shujtaj llajtacunaca: “Mandaj Diosca chaicunapajca jatun ruranacunatamari rurashca” nircacunami.

³ Mandaj Diosca ñucanchijpajca jatun ruranacunatamari rurashca. Cushijllamari canchij.

⁴ Mandaj Dioslla, ñucanchijtaca prezu cashcamanta tigrachihuayari. Neguev llajtapi tiyaj jatun yacuta shina rurahuayari.

⁵ Huacaihuan tarpujcunaca, cushicuihuanmi tandangacuna.

⁶ Sumaj muyuta tarpunamanca huacaihuanmi ringa. Ashtahuanpish tigrashpaca cushicuihuanmi gavillacunata apashca shamunga.