SALMOS 125 - Dios Rimashca Shimicunami

SALMO 125 Taita Diosca paipaj cajcunataca cuidanmi

Huichiyacushpa cantanami.

¹ Mandaj Diospi shunguta churajcunaca Sión urcu shinami. Chai urcuca maiman mana cuyurishpa chaillapitaj huiñaipaj caj shinami.

² Jerusalenca achca urcucunahuan muyunchishcami. Mandaj Diosca chai shinallatajmi paipaj cajcunataca cunanpish huiñaitapish muyundijta cuidacun.

³ Cashcata rurajcunaman cushca llajtapica, millaita rurajcunaca mana unita mandangacunachu. Cashcata rurajcunapish paicunapaj maquita millaita ruranaman ama chutachunmi chashna canga.

⁴ Mandaj Dioslla, allicunapajca allita rurayari. Paicunapaj shungupi ima pandata mana rurana munaita charijcunapajca allita rurayari.

⁵ Ashtahuanpish Mandaj Diosmanta anchurishpa millaita ruranata catijcunataca, Mandaj Diosmi millaicunallahuantaj cachanga. ¡Israelpica sumaj causai tiyashca cachun!