SALMOS 124 - Dios Rimashca Shimicunami

SALMO 124 P'iñajcunamanta cacharichishcamanta alabashcami

Huichiyacushpa David cantanami.

¹ Mandaj Dios mana ñucanchijmanta shayaringapaj tiyashca cashca cajpica, aij ñucanchijlla. Cunanca israelcuna cashna nishunchigari:

² “Mandaj Dios mana ñucanchijmanta shayaringapaj tiyashca cashca cajpica, aij ñucanchijlla. Shujtajcuna ñucanchijhuan macanacungapaj jatarishpaca,

³ nina sindirij shina ñucanchijhuan p'iñarishpamari ñucanchijtaca causajta millpunman carca.

⁴ Ñucanchijtaca jatun yacu shamuj shinamari tapanman carca. Chai yacu ñucanchij jahuata pasaj shinamari llapinman carca.

⁵ Yacu jundashca ñucanchij jahuata pasashca shinamari” canman carca.

⁶ ¡Mandaj Diosca alli nishca cachun! Ñucanchijta paicunapaj quirucunahuan cashtuchun mana saquij, Mandaj Diosca alli nishca cachun.

⁷ Ñucanchijca pajarocunata japijcunapaj linchimanta pájaro llushpirij shinamari quishpirircanchij. Paicunapaj linchi lliquirijpimari, ñucanchijca llujshircanchij.

⁸ Ñucanchijta ayudanaca Mandaj Diospaj shutipimi tiyan. Paica jahua pachata, cai pachata rurajmi.