SALMOS 122 - Dios Rimashca Shimicunami

SALMO 122 Jerusalenpi sumaj causai tiyachun Diosta mañashcami

Huichiyacushpa David cantanami

¹ “Mandaj Diospaj huasiman jacuchij” nijcunahuanmi ñucaca cushicurcani.

² Jerusalén, ñucanchij chaquicunaca ñamari cambaj pungu ucupi,

³ Jerusalenca shuj pueblota paicunapurallata alli tandachishpa shayachishca shinami.

⁴ Chaimanmi huichiyancuna. Mandaj Diospaj aillucunami huichiyancuna. Israelcunaman ima shina causanata yachachishcapi nishca shina Mandaj Diospaj shutita alabangapajmi huichiyancuna.

⁵ Chaipica imatapish ima shina cashcatataj rurashpa ricuchijcuna tiyanami tiyacun. Davidpaj huahua huahua mandajcuna tiyanami tiyacun.

⁶ Jerusalenpica sumaj causai tiyachun cashna mañaichigari: ¡Canta c'uyajcunaca achca allicunayuj tucushca cachun!

⁷ Cambaj muyundij jatun pircashca ucumanca, sumaj causai tiyashca cachun. Cambaj mandana huasi ucucunapica samarina tiyashca cachun nichigari.

⁸ Ñuca huauquicunata, ñucahuan purijcunata c'uyashcamantami ñucaca: “Sumaj causai canhuan cashca cachun” nini.

⁹ Mandaj Dios, ñucanchij Taita Diospaj huasita c'uyashcamantami, cambajca allicunata mashcasha.