SALMOS 120 - Dios Rimashca Shimicunami

SALMO 120 Umaj c'allucunamanta cacharichichun mañashcami

Huichiyacushpa cantanami.

¹ Ñuca llaquipi cashpaca, Mandaj Diostami mañarcani. Paica ñuca mañashcata uyahuarcami.

² Mandaj Dioslla, llulla c'allumantapish, umajcunamantapish ñuca causaitaca quishpichihuayari.

³ Llullaj c'allu llullaj cashcamantaca ¿imatataj japigringuiyari? ¿imatataj chasquigringuiyari?

⁴ C'ari c'ari runa cajmari puntasapa caspicunahuan huañuchinga. Enebro rupaj puca ninahuanmari llaquichinga.

⁵ ¡Aij ñucalla, Mesecpi causacunica, Cedarpaj carpa huasicuna chaupipi causacunica!

⁶ Sumaj causaita p'iñajcunahuanca, ñamari unita causashcani.

⁷ Ñucaca sumaj causaita munajmi cani. Ashtahuanpish paicunaca ñuca rimai callarijpica, huaicashpamari macanacushun nincuna.