SALMOS 12 - Dios Rimashca Shimicunami

SALMO 12 Millaicunamanta quishpichihuai nishpa Diosta mañashcami

Tonota alli yachaj, pusaj cuerdayuj tocanapi cantachichun, David rurashca Salmomi.

¹ Mandaj Dioslla, quishpichihuayari. Canta yuyarijtajcunaca mana tiyanca. Huañujlla runacunapurapica can nishca shinataj rurajcunaca chingarishcacunamari.

² Tucuicunami caishujmanta chaishujmanta llullashpa parlanacun. Shimihuanca mishquijlla uyananquitami riman. Shungupica manapish pajtachina yuyaihuanmi.

³ Mandaj Diosca jahua shimilla uyananquita rimajcunataca tucuitami chingachinga. Jatun tucushpa rimarijcunatapish chingachingami.

⁴ Chaicunaca: “Ñucanchij c'alluhuan rimashpaca mishashunllami. Ñucanchij shimica ñucanchijpajmi ¿pitaj ñucanchijta mandajca?” nincunami.

⁵ Mandaj Diosca cashnami nin: “Huajchacunataca llaquichicuncunami, ima illajcunaca aij, nishpami mañacuncuna. Paicunamantaca ñucami shayarigrini. Llaquimanta llujshichihuai nishpa shungu llujshishpa mañashcamantaca quishpichishami” ninmi.

⁶ Mandaj Dios rimashca shimicunaca chuyami. Pai rimashca shimicunaca allpa hornopi canchis cutin rupachishpa, tucui mapata anchuchishca chuya cullqui shinami.

⁷ Can Mandaj Diosmi, ñucanchijtaca huaquichingui. Cai millaicunapaj maquimantaca canmi huiñaipaj huaquichingui.

⁸ Huañujlla runacuna mana alli ruranacunata alabacujpica, millaicunaca chaipimi muyucuncuna.