SALMOS 119 - Dios Rimashca Shimicunami

SALMO 119 Taita Dios mandashcacunaca sumajmari Alef

Alef

¹ Alli ñanllapi purijcunaca cushichishcacunami. Mandaj Diospaj mandashcallapi purijcunaca cushichishcacunami.

² Ima shina causanata pai yachachishcata huaquichijcunaca cushijllacunami. Tucui shunguhuan chaita mashcajcunaca cushijllacunami.

³ Pai yachachishca ñanpi purijcunaca ima millaita mana rurancunachu.

⁴ Quiquin mandashcacunataca tucuita chaitataj pajtachichunmi cushcangui.

⁵ Quiquin chaitataj pajtachichun nishcacunata pajtachingapaj ñuca ñanca mana cuyuchipaj cangapishchari.

⁶ Quiquin imalla mandashcaca tucui quiquin mandashcataj cashcata entendishpaca ñucaca mana pingachishca cashachu.

⁷ Quiquin mandashcacunaca ima panda mana cashcata yachashpaca, ñuca tucui shunguhuanmi quiquintaca alabasha.

⁸ Quiquin chaitataj pajtachichun nishcacunatami pajtachisha. Ñucataca amataj saquihuanguichu.

Bet

Bet

⁹ Q'uipa huiñaica, ¿imahuantaj paipaj ñantaca chuyayachingari? Quiquinpaj shimita huaquichishpallami chuyayachi tucunga.

¹⁰ Ñuca tucui shunguhuanmi quiquintaca mashcarcani. Quiquin mandashcacunamanta anchurichunca, amataj saquihuanguichu.

¹¹ Ama juchallishpa quiquinta p'iñachingapajca quiquin imalla nishcacunataca ñuca shungupimi huaquichircani.

¹² Mandaj Dioslla, quiquinca allimi cangui. Quiquin chaitataj pajtachichun nishcacunata yachachihuayari.

¹³ Quiquinpaj shimihuan tucui imallata mandashcataca, ñuca shimihuanmi huillarcani.

¹⁴ Ima shina causanata quiquin yachachishca ñanpi purishpami, achca charinacunamantapish yalli cushicuni.

¹⁵ Quiquin mandashcacunata, cutin cutin alli yachashpaca, quiquinpaj ñan cashcatami entendisha.

¹⁶ Chashna cashpaca quiquin chaitataj pajtachichun nishcacunapimi yallitaj cushicusha. Quiquinpaj shimicunataca manataj cungarishachu.

Guímel

Guímel

¹⁷ Quiquinpajta ruraj causachun, quiquinpaj shimita huaquichichun quiquinpajta rurajpaj allita rurapayari.

¹⁸ Quiquin mandashcacunapi mancharinacuna tiyacujta ricungapaj ñuca ñahuita pascahuai.

¹⁹ Ñucaca cai pachapica shujtaj llajtamanta pasacuj runa shinallami cani. Quiquin mandashcacunata ama ñucamanta pacahuaichu.

²⁰ Ñuca almaca quiquin imallata mandashcacunata punllanta yachanaihuan huañucunmari.

²¹ Quiquin mandashcacunamanta anchurij jatun tucushca, millaicunataca sinchitami rimarcangui.

²² Mana alli nishca canatapish, yanganchishca canatapish ñucamanta caruyachiyari. Ñucaca ima shina causanata quiquin yachachishcatamari huaquichircani.

²³ Mandajcunapish paicunapura tiyarishpami, ñucata rimarcacuna. Ashtahuanpish quiquinpajta rurajca quiquin chaitataj pajtachichun nishcacunata pajtachina yuyaillami carcani.

²⁴ Ima shina causanata quiquin yachachishcacunaca, ñucapajca mishquimari. Ñucata cunajcunamari.

Dálet

Dálet

²⁵ Ñucaca ña allpa tucushca shinamari cani. Quiquinpaj shimihuan nishca shina ñucaman cutin fuerzata cuhuayari.

²⁶ Ñuca causaipi ima shina cashcatami quiquinman huillarcani. Quiquinca cutichircanguimi. Quiquin chaitataj pajtachichun nishcacunata yachachihuayari.

²⁷ Quiquin mandashcacunapi imalla nicushcacunata entendichihuayari. Quiquinpaj mancharinacunata cutin cutin alli yachangapaj entendichihuayari.

²⁸ Ñuca almaca llaquihuan yacuyashpa tucuricunca. Quiquinpaj shimihuan nishca shina jatarichihuayari.

²⁹ Llulla ñanmanta ñucata anchuchihuayari. Quiquin llaquij cashcamanta quiquinpaj mandashcata cuhuayari.

³⁰ Ñucaca mana llulla ñantami agllarcani. Quiquin mandashcacuna yuyaillami cani.

³¹ Ima shina causanata quiquin yachachishcapi llutarishca shinami cani. Mandaj Dioslla ñucataca ama pingachihuaichu.

³² Quiquin mandashcacunapimi callpashpa purisha. Ñuca shunguta quiquin cushichijpimi chashna purisha.

He

He

³³ Mandaj Dioslla, chaitataj pajtachichij ñanta yachachihuayari. Tucuringacamami catirasha.

³⁴ Quiquin mandashcata huaquichingapaj yuyaita pascahuayari. Tucui shunguhuanmari chaitaca pajtachisha.

³⁵ Quiquin mandashcacunapaj ñanpi pushahuayari. Chaicunata pajtachina munaillami cani.

³⁶ Ñuca shungutaca ima shina causanata quiquin yachachishcata cazujta rurapayari. Quiquinpajlla charina munaiyujtaca ama rurahuaichu.

³⁷ Yangacunallapi ñuca ñahuita churanamanta anchuchihuayari. Quiquinpaj ñanpi puringapaj causaita cuhuayari.

³⁸ Quiquinta manchaj, quiquinpajta rurajman quiquin cusha nishcataca pajtachiyari.

³⁹ Yanganchishca canatamari manchacuni. Chaita ñucamanta anchuchipaiyari. Quiquinca cashcata rurashpa ricuchijmi cangui.

⁴⁰ Ñucaca quiquin cushca mandashcacunata pajtachina munaillamari cani. Cashcata ruraj cashca shinallataj cutin fuerzata cuhuayari.

Vau

Vau

⁴¹ Mandaj Dioslla, quiquinpaj nishcapi nishca shinallataj quiquinpaj llaquij cana ñucapajman shamuchun. Mandaj Dioslla, quiquinpaj nishcapi nishca shinallataj quiquinpaj quishpichinaca ñucapajman shamuchun.

⁴² Ñucata pingachijcunamanca quiquinpaj shimipi shunguta churashcatami cutichisha.

⁴³ Imatapish cashcata rimaj canataca, amataj ñuca shimimanta anchuchihuaichu. Ñucaca quiquin mandashcacunatami shuyani.

⁴⁴ Quiquin mandashcataca huiñaicama huaquichicushallami. Huiñai huiñaita pajtachicushallami.

⁴⁵ Quiquin mandashcacunatami mashcani. Pi mana imata nishcami purisha.

⁴⁶ Ima shina causachun quiquin yachachishcataca, jatun mandajcunapaj ñaupajpimi huillasha. Ñucaca manataj pingarishachu.

⁴⁷ Quiquin mandashcacunapimi yallitaj cushicusha. Chaicunatamari c'uyarcani.

⁴⁸ Quiquin mandashcacunata c'uyaj cashcamantaca, ñuca maquitami huichi alzasha. Quiquin chaitataj pajtachichun nishcacunataca cutin cutin yuyaricushallami.

Zain

Zain

⁴⁹ Quiquinpajta ruraj ñucaman quiquinpaj shimita cushcapi nishcata yuyaripayari. Chaipimari ñucataca shunguta churachircangui.

⁵⁰ Ñuca llaquihuan cajpica, quiquinpaj shimimi cushichin. Quiquin cusha nishcacunamari ñucamanca fuerzata cun.

⁵¹ Jatun tucushcacunaca ñucataca yallitajmari chanzata rurarcacuna. Shina cajpipish, quiquin mandashcamantaca manataj anchurircanichu.

⁵² Mandaj Dioslla, ñaupaman can ima shina cashcata ricushpa mitsaj cashcatami yuyarircani. Chaimantami cushicurcani.

⁵³ Millaita rurajcunata ricushpamari yallitaj p'iñarini. Paicunaca quiquin mandashcamanta anchurishpami chashna tucuncuna.

⁵⁴ Ñucaca ajeno huasillapi cashpapish cantocunata cantashcami ñucapajca quiquin mandashcaca carca.

⁵⁵ Mandaj Dioslla, tutaca quiquinpaj shutitami yuyarircani. Quiquin mandashcatami pajtachircani.

⁵⁶ Quiquinpaj mandashcacunata pajtachishcamantami, cai tucui allicunataca charini.

Chet

Chet

⁵⁷ Ñuca charinaca Mandaj Diosmari. Quiquinpaj shimicunataca pajtachishatajmi nircanimi.

⁵⁸ Ñuca tucui shunguhuanmi quiquin ñucaman ricurichun mañarcani. Quiquin nishca shinallataj ñucata llaquihuayari.

⁵⁹ Ñuca ima shina causacushcatami alli alli yuyarircani. Mai ñanpi puricushcata yuyarishpami, quiquin yachachishcapi puringapaj tigrarcani.

⁶⁰ Quiquin mandashcacunataca utcami pajtachircani, mana uniyarcanichu.

⁶¹ Millaicunaca huaicashpami ñucataca muyunchircacuna. Ashtahuanpish quiquin mandashcataca, manataj cungarircanichu.

⁶² Cashcata rurashpamari, ñucataca mitsahuarcangui. Chaimantami chaupi tutapi quiquinta alabangapaj jatarircani.

⁶³ Quiquinta tucui manchajcunahuanmi chaipurallataj cani. Quiquin mandashcacunata huaquichijcunahuanmi chaipurallataj cani.

⁶⁴ Mandaj Dioslla, quiquin llaquij cashcaca tucui cai pachapi jundamari. Quiquin mandashcacunata pajtachinata yachachihuayari.

Tet

Tet

⁶⁵ Mandaj Dioslla, quiquinpajta rurajpajca, allitamari rurashcangui. Quiquinpaj shimipi nishca shinatajmi rurashcangui.

⁶⁶ Quiquin mandashcacunapimi shunguta churarcani. Alli yuyaita, alli yachaita cuhuayari.

⁶⁷ Manaraj cumurichishca cashpaca maipish cachunmi causarcani. Ashtahuanpish cunanca quiquinpaj mandashcatamari pajtachicuni.

⁶⁸ Quiquinca allimari cangui, allicunata rurajmari cangui. Quiquin chaitataj pajtachichun nishcacunata yachachihuayari.

⁶⁹ Jatun tucushcacunaca llullashpallamari ñucataca juchachircacuna. Ashtahuanpish ñucaca tucui shunguhuanmi quiquin mandashcacunata huaquichisha.

⁷⁰ Paicunapaj shunguca sebo shinami rumiyarca. Ashtahuanpish ñucaca quiquin mandashcapimi yallitaj cushicurcani.

⁷¹ Ñucata cumurichishcaca allimari cashca. Quiquin chaitataj pajtachichun nishcata yachachunmari chashna rurarcangui.

⁷² Ñucapajca quiquinpaj shimimanta llujshishca mandashcaca huaranga huaranga curitapish, cullquitapish yallimari.

Yod

Yod

⁷³ Ñucataca quiquinpaj maquihuan rurashpami callarichircangui. Quiquinpaj mandashcacunata yachangapaj entendichihuayari.

⁷⁴ Quiquinta manchajcuna ñucata ricushpaca cushicungacunami. Ñucaca quiquin mandashcapimi shunguta churarcani.

⁷⁵ Mandaj Dioslla, quiquin mandashcacunaca cashcata ruraj cashcataca yachanimi. Quiquinca chaitataj pajtachij cashca shinallatajmi llaquichircangui.

⁷⁶ Quiquin llaquij canaca cunanca ñuca cushicuna cachun. Quiquinpajta ruraj ñucaman cusha nishca shinallataj chaica cachun.

⁷⁷ Quiquin llaquij canaca ñucaman fuerzata cunaman shamushca cachun. Quiquin mandashcacunaca ñuca cushicunamari.

⁷⁸ Jatun tucushcacunaca pingachishca cachun. Paicunaca ñucataca yangamantamari juchachircacuna. Ashtahuanpish ñucaca quiquin mandashcacunatami cutin cutin yachacushalla.

⁷⁹ Quiquinta manchajcunaca ñucapajman cutimushca cachun. Ima shina causanata quiquin yachachishcata rijsijcunaca ñucapajman cutimushca cachun.

⁸⁰ Ñuca ama pingachishca cangapajca, quiquin chaitataj pajtachichun nishcacunapi ñuca shunguca imata mana pandaj cashca cachun.

Caf

Caf

⁸¹ Quiquin quishpichichun nishpa, ñuca almaca huañucunca. Quiquin mandashcapimari ñuca shunguta churani.

⁸² Can rurasha nishcata pajtachiman shamujtaca ñahui amsayajtamari chapacunilla. ¿Ima horastaj ñucataca cushichinguiyari?

⁸³ Cushni llujshinapi capachuta huarcushca shina cashpapish, quiquin chaitataj pajtachichun nishcataca manataj cungarishcanichu.

⁸⁴ Quiquinpajta rurajca ¿maicamataj llaquita apashpa causacushallari? Catirashpa ñucata llaquichijcunataca ¿ima horastaj cashcata rurashpa ricuchinguiyari?

⁸⁵ Jatun tucushcacunaca ñuca urmachunmari jutcucunata allashcacuna. Quiquin mandashca shina mana rurajcunamari chashna rurashcacuna.

⁸⁶ Quiquin tucui mandashcacunaca mana llullamari. Ñucataca yangallamari catirashpa llaquichincuna. Ayudahuayari.

⁸⁷ Ñucataca ashallamantamari cai pachamantaca mana anchuchincuna. Shina cajpipish, quiquin mandashcacunataca manataj saquishcanichu.

⁸⁸ Quiquin llaquij cashca shinallataj ñucaman cutin fuerzata cuhuayari. Ñucapish ima shina causanata quiquinpaj shimihuan yachachishcataca pajtachishami.

Lámed

Lámed

⁸⁹ Mandaj Dioslla, quiquinca huiñaipajmi cangui. Quiquinpaj shimicunaca jahua pachapimi huiñaipaj tiyacun.

⁹⁰ Quiquin pajtachij cashcaca huahua huahuacunata caticungallami. Cai pachaca quiquin maipi churashcallapitajmi sinchita tiyacun.

⁹¹ Tucui imalla tiyajcunapish, quiquin mandashcapimi cunancama tiyacun. Tucui chaicunami quiquinpajta ruracuncuna.

⁹² Quiquin mandashca ñucata mana cushichishca cajpica, ñuca llaquihuan cashpamari ña chingariman carcani.

⁹³ Quiquin mandashcacunataca manataj cungarishachu. Chaicunahuanmi ñucamanca cutin fuerzata cuhuashcangui.

⁹⁴ Ñucaca quiquinpajmari cani quishpichihuayari. Quiquin mandashcacunata mashcajmari cani.

⁹⁵ Millaicunaca ñucata chingachingapaj chapacuncunamari. Ashtahuanpish ñucaca ima shina causanata quiquin yachachishcatami alli nini.

⁹⁶ Tucui imalla cai pachapi tiyaj sumajcunaca tucurijllami. Ashtahuanpish quiquin mandashca shimicunaca manataj chingaringachu.

Mem

Mem

⁹⁷ ¡Quiquin mandashcataca ñucaca mashnatamari c'uyani! Chai mandashcaca punllanta ñuca cutin cutin yuyaricunallami.

⁹⁸ Quiquin mandashcacunahuanca ñucata p'iñajcunata yalli yachajtamari ñucataca rurashcangui. Chaicunaca ñucamantaca manataj anchunchu.

⁹⁹ Ima shina causanata quiquin yachachishcacunatamari cutin cutin yuyaricujlla cani. Chaimi ñucata yachachijcunatapish yalli entendini.

¹⁰⁰ Quiquin mandashcacunata huaquichishcamantaca yuyajcunata yallimari entendishcani.

¹⁰¹ Quiquin mandashcata pajtachingapajca, tucui millai ñanmantami anchurircani.

¹⁰² Quiquinpaj mandashcacunamantaca ñucaca manataj anchurinichu. Chaitaca quiquinmari yachachircangui.

¹⁰³ ¡Quiquinpaj shimicunaca ñuca shimipica tucuimanta yalli mishquimari! ¡Ñuca shimipica sacha chuspipaj mishquitapish mai yallimari!

¹⁰⁴ Quiquin mandashcacunapimi alli yuyaita japircani. Chaimantami tucui llulla ñantaca p'iñarcani.

Nun

Nun

¹⁰⁵ Quiquinpaj shimica ñuca chaqui sarunata achijyachijmi. Ñuca ñanta achijyachijmi.

¹⁰⁶ Cashcata rurachun quiquin mandashcacunataca pajtachishatajmi nircanimi, chaitaca rurashatajmi.

¹⁰⁷ Yallitaj llaquipimari cani. Mandaj Dioslla, quiquinpaj shimipi nishca shinallataj cutin fuerzata cuhuayari.

¹⁰⁸ Mandaj Dioslla, ñuca shimihuan cantashcata quiquinman cushcaca quiquin munashca shina cachunmi rogani. Quiquin mandashcacunatapish yachachichunmari rogani.

¹⁰⁹ Ñuca causaica cunanpish, cayapish huañunallapimari cani. Shina cashpapish, quiquin mandashcataca manataj cungarircanichu.

¹¹⁰ Millaicunaca ñuca tsagnarinatami churarcacuna. Shina cajpipish, quiquinpaj mandashcacunamantaca manataj anchurircanichu.

¹¹¹ Ima shina causanata quiquin yachachishcaca ñuca shunguta cushichij cashcamanta, ñuca japina cashcatami huiñaipaj japircani.

¹¹² Ñuca shungutaca quiquin chaitataj pajtachichun nishcata pajtachijtamari rurarcani. Chaica ñuca tucui causaipi cana cashcamantami chashna pajtachina tucurcani.

Sámec

Sámec

¹¹³ Mishqui shimi jayaj shungu runacunataca p'iñanimi. Ashtahuanpish quiquin mandashcataca c'uyanimi.

¹¹⁴ Quiquinca ñuca miticuna, ñuca escudomi cangui. Quiquinpaj shimi nishcatami shuyacunilla.

¹¹⁵ ¡Millaicuna, ñucamanta anchurichij! Ñucaca ñuca Taita Dios mandashcacunatami pajtachisha.

¹¹⁶ Quiquinpaj shimipi nishca shinallataj ñucata charirahuayari. Ñucaca causacushallami. Chaipitajca ñuca shuyacushcamantaca mana pingai tucushachu.

¹¹⁷ Quiquin charirajpica, quishpirishcami casha. Quiquin chaitataj pajtachichun nishcapimi punllanta cushicusha.

¹¹⁸ Quiquin chaitataj pajtachichun nishcacunamanta anchurijcunataca tucuicunatami sarurcangui. Paicunaca imata yuyarishpapish llullangapajlla cajpimi chashna rurarcangui.

¹¹⁹ Quiquinta mana rijsijcunataca, mapa ñucuta shinami cai pachamanta chingachircangui. Chaimantami ñucaca ima shina causanata quiquin yachachishcacunataca c'uyarcani.

¹²⁰ Ñuca aichaca quiquinta manchashcamanta chujchucunmari. Quiquin mandashcacunataca manchacunimari.

Ayin

Ayin

¹²¹ Ñucaca cashcatamari, imapish allitamari rurarcani. Ñucata p'iñajcunapaj maquipi ama shitahuaichu.

¹²² Quiquinpajta ruraj ñucapajca pi mana cuyuchipaj mitsaj cayari. Jatun tucushcacuna ñucata llaquichichunca, ama saquihuaichu.

¹²³ Quiquin quishpichiman shamujtaca ñuca ñahui amsayajtami chapani. Quiquinpaj shimipi nishca shina cashcata ruranaman shamujtamari chapani.

¹²⁴ Quiquinpajta rurajpajca quiquin llaquij cashca shinataj rurayari. Quiquin chaitataj pajtachichun nishcacunata yachachihuayari.

¹²⁵ Ñucaca quiquinpajta rurajmari cani. Ima shina causanata quiquin yachachishcacunata yachangapaj yuyaita cuhuayari.

¹²⁶ Quiquinpaj mandashcacunata mana valichishcamantaca Mandaj Dioslla, ñamari imatapish rurana cangui.

¹²⁷ Ñucaca quiquin mandashcacunataca, curitapish yalli, ashtahuan alli curitapish yallimi c'uyarcani.

¹²⁸ Chaimantamari quiquin mandashcacunaca imapi mana panda cajpi, tucui imamantapish yalli munani. Tucui llulla ñancunataca p'iñanimi.

Pe

Pe

¹²⁹ Ashtahuanpish ima shina causachun quiquin yachachishcaca sumajmari. Chaimantamari ñucaca tucuita huaquichini.

¹³⁰ Quiquinpaj shimicunata alli, alli yachachijpica, achijyachinmari. Yachai illajcunatapish entendichinmari.

¹³¹ Shimita pascashpa samaita millpuj shinami quiquin mandashcacunataca tucui munaihuan yacharcani.

¹³² Ñucata tigra ricuhuayari. Ñucataca llaquihuayari. Quiquinpaj shutita c'uyajcunata llaquij cashca shinallataj llaquihuayari.

¹³³ Ñuca chaqui purinatapish quiquinpaj shimihuan mandahuai. Ima millai mandashca ama cangapaj ñucata pushahuai.

¹³⁴ Millai runacuna llaquichicunmanta llujshichihuayari. Ñucaca quiquin mandashcacunatamari huaquichisha.

¹³⁵ Quiquinpajta ruraj ñucataca quiquinpaj c'uyaj ñahuihuan achijyachihuayari. Quiquin chaitataj pajtachichun nishcacunata yachachihuayari.

¹³⁶ Quiquin mandashcata mana pajtachishcamantami ñuca ñahuimanta huiquica jatun yacu shina rirca.

Tsade

Tsade

¹³⁷ Mandaj Dioslla, quiquinca cashcata rurajmi cangui. Quiquin mandashcacunapish ima mana pandamari.

¹³⁸ Ima shina causanata yachachichun quiquin cushcacunaca ima mana pandachu, cashcata yachachij shimicunami.

¹³⁹ Ñucata p'iñajcunaca quiquinpaj shimicunatamari cungarishcacuna. Chaimari ñucaca huañurishpa tucuricuni.

¹⁴⁰ Quiquinpaj shimicunaca tucuimanta yalli chuyamari. Chaimantami quiquinpajta ruraj ñucaca c'uyani.

¹⁴¹ Ñucaca uchillami cani, shujtajcuna p'iñashcami cani. Chashna cashpapish quiquin mandashcacunataca manataj cungarircanichu.

¹⁴² Quiquinpaj cashcata ruranaca huiñaita mana shujtajyangachu. Quiquin mandashcaca mana llullami.

¹⁴³ Imata mana rurai tucuipaj llaquicunamari ñucataca japirca. Ashtahuanpish quiquin mandashcacunaca ñuca cushicunamari.

¹⁴⁴ Ima shina causanata quiquin yachachishcacunaca huiñaita mana shujtajyangachu. Entendichihuayari, causashallami.

Cof

Cof

¹⁴⁵ Mandaj Dioslla, ñuca tucui shunguhuanmari quiquinta mañapani. Ñucata uyahuayari. Quiquin chaitataj pajtachichun nishcacunatamari pajtachisha nini.

¹⁴⁶ Mandaj Dioslla quiquintami mañapani quishpichihuayari. Ima shina causanata quiquin yachachishcacunatamari pajtachisha nini.

¹⁴⁷ Manaraj pacarijpimari mañarcani. Quiquinpaj shimipimari ñuca shunguta churani.

¹⁴⁸ Quiquin mandashcacunata alli alli yuyaringapajmi, tutacunapish mana dormircani.

¹⁴⁹ Ñuca mañashcataca quiquin llaquij cashca shinallataj uyahuayari. Mandaj Dioslla, quiquin cashcata ruraj cashca shinallataj cutin fuerzata cuhuayari.

¹⁵⁰ Ñucata catirashpa llaquichijcunaca millaimanmari ashtahuan c'uchuyancuna. Quiquin mandashcamantamari caruyancuna.

¹⁵¹ Mandaj Dioslla, quiquinca ñuca c'uchullapimi cangui. Quiquinpaj mandashcacunaca tucuipi ima mana llullamari.

¹⁵² Ima shina causanata quiquin yachachishcacunataca, ña unitami yachani. Chaitaca huiñaipajmi churashcangui.

Resh

Resh

¹⁵³ Ñuca llaquipi cajta ricuhuayari, llujshichihuayari. Quiquin mandashcataca manataj cungarircanichu.

¹⁵⁴ Ñucamanta shayarishpa quishpichihuayari. Quiquinpaj shimipi nishca shinallataj cutin fuerzata cuhuayari.

¹⁵⁵ Quiquinta mana rijsijcunaca quiquin chaitataj pajtachichun nishcacunataca mana mashcancunachu. Chaimanta paicuna quishpirinaca carupimari.

¹⁵⁶ Mandaj Dioslla, quiquin llaquij cashcaca yallitaj achcamari. Quiquinpaj mandashcapi nishca shinallataj cutin fuerzata cuhuayari.

¹⁵⁷ Ñucata catirashpa llaquichijcunaca, ñucata p'iñajcunaca achcacunamari. Ashtahuanpish ima shina causanata quiquin yachachishcacunamantaca manataj anchurircanichu.

¹⁵⁸ Huashalla llaquichijcunata ricushpamari p'iñanachircani. Quiquinpaj shimipi nishcacunata mana pajtachijpimari p'iñanachircani.

¹⁵⁹ Mandaj Dioslla, quiquin mandashcacunata ñuca c'uyajtaca ricunguimi. Quiquin llaquij cashca shinallataj cutin fuerzata cuhuayari.

¹⁶⁰ Quiquinpaj tucui shimicunaca ima mana pandachu tucuimi alli. Cashcata ruranata yachachij quiquin mandashcacunaca huiñaipajmi.

Sin

Sin

¹⁶¹ Mandajcunaca ñucataca yangamantamari catirashpa llaquichincuna. Shina cajpipish, ñucaca quiquinpaj shimicunataca tucui shunguhuanmi mancharcani.

¹⁶² Ñucaca macanacuita mishashpa achca charinacunata japij shinami quiquinpaj shimicunapica yallitaj cushicuni.

¹⁶³ Llullanataca p'iñanimi, millanimi. Quiquin mandashcatami c'uyani.

¹⁶⁴ Punllanta canchis cutinmi quiquintaca alabani. Cashcata ruraj mandashcacunata cushcamantami chashna alabani.

¹⁶⁵ Quiquin cushca mandashcacunata c'uyajcunaca, sumajta causanatami achcata charincuna. Ima ñitcarinaca paicunapajca mana tiyanchu.

¹⁶⁶ Mandaj Dioslla, quiquin quishpichichunmari shuyacurcani. Quiquin mandashcacunata chaitataj pajtachina yuyailla tucushpamari pajtachircani.

¹⁶⁷ Ima shina causanata quiquin yachachishcatami ñucaca pajtachini. Chaicunataca ñucaca yallitajmi c'uyani.

¹⁶⁸ Quiquin mandashcacunata, ima shina causanata quiquin yachachishcacunatami pajtachircani. Tucui ñuca purishcacunaca quiquinpaj ñaupajpimi.

Tau

Tau

¹⁶⁹ Mandaj Dioslla, ñuca mañashcaca quiquinpaj ñaupajman chayashca cachun. Quiquinpaj shimipi nishca shinallataj ñucamanca alli yuyaita cuhuayari.

¹⁷⁰ Ñuca mañashcaca quiquinpaj ñaupajman chayashca cachun. Quiquinpaj shimipi nishca shinallataj ñucataca quishpichihuailla.

¹⁷¹ Quiquin chaitataj pajtachichun nishcacunata ñucaman yachachijpimi, ñuca shimihuanca quiquinta alabasha.

¹⁷² Quiquin quiquinpaj shimita cushcamantami cantani. Quiquinpaj cushca tucui mandashcacunaca cashcata ruraj cashcamantami cantani.

¹⁷³ Quiquin mandashcacunatami agllarcani. Quiquinpaj maquihuan utca ayudahuanguiyari.

¹⁷⁴ Mandaj Dioslla, quiquinpaj quishpichinatami munani. Quiquinpaj mandashcacunami ñucataca cushichin.

¹⁷⁵ Quiquinta alabangapajmi ñucaca causacuni. Quiquinpaj mandashcacuna ñucataca ayudashca cachun.

¹⁷⁶ Chingarishca oveja shinamari puricuni. Quiquinpajta rurajtaca mashcahuayari. Quiquin mandashcacunataca manataj cungarij carcanica.