SALMOS 115 - Dios Rimashca Shimicunami

SALMO 115 Taita Diospish, rurashcalla dioscunapish

¹ Mandaj Dioslla alabashca canaca mana ñucanchijpajchu, mana ñucanchijpajchu quiquinpaj shutitamari alabashca cana cangui. Quiquinca c'uyaj cashcamanta, mana llullaj cashcamantami chashna alabashca cana cangui.

² Imamantataj gentecunaca: “¿Cambaj Diosca cunanca maipitagari?” ningacunari.

³ Ashtahuanpish ñucanchij Taita Diosca jahua pachapimari. Pai tucui imalla rurasha nishcatami rurashca.

⁴ Paicunapaj dios nishcacunaca cullquihuan, curihuan rurashcallacunamari. Runacunapaj maquihuan rurashcallamari.

⁵ Shimita charishpapish, mana rimancunachu. Ñahuita charishpapish, mana ricuncunachu.

⁶ Rinrinta charishpapish, mana uyancunachu. Singata charishpapish, mana mutquincunachu.

⁷ Maquita charishpapish, mana imata japincunachu. Chaquita charishpapish, mana purincunachu. Cungata charijpipish ima rimashca mana uyarinchu.

⁸ Chaicunata rurajcunaca chaicunallamantaj rijchajcunami. Chai dioscunapi shunguta churajcunapish chaicuna shinallatajmi.

⁹ Israel, Mandaj Diospi shunguta churai. Paica canta ayudajmi. Cambaj escudopishmi.

¹⁰ Aaronpaj huahuacunapish, Mandaj Diospi shunguta churaichij. Paica cancunata ayudajmi. Paica cancunapaj escudomi.

¹¹ Mandaj Diosta manchajcuna, Mandaj Diospi shunguta churaichij. Paica cancunata ayudajmi. Paica cancunapaj escudomi.

¹² Mandaj Diosca ñucanchijta yuyarishcamari. Ñucanchijtaca alli ningamari. Israelcunataca alli ningamari. Aaronpaj huahua huahuacunataca alli ningamari.

¹³ Mandaj Diosta manchajcunataca alli ningamari. Uchillacunatapish, jatuncunatapish alli ningamari.

¹⁴ Mandaj Diosca cancunatapish mirachichun, cancunapaj huahuacunatapish mirachichun.

¹⁵ Mandaj Diospaj cajcuna alli nishca caichij. Jahua pachata, cai pachata ruraj Dios alli nishca caichij.

¹⁶ Jahua pachacunaca jahua pachapi caj Mandaj Diospajmi. Cai pachataca huañujlla runacunamanmi cushca.

¹⁷ Huañushcacunaca Mandaj Diostaca mana alabangacunachu. Upajlla canaman uriyajcunaca mana alabangacunachu.

¹⁸ Ashtahuanpish ñucanchijmi, Mandaj Diostaca cunanmantapacha huiñai huiñaita alabacushun. ¡Mandaj Diosta alabaichigari!