SALMOS 114 - Dios Rimashca Shimicunami

SALMO 114 Egiptomanta llujshichicushpa mancharinacunata rurashcata cantashcami

¹ Israelcunaca Egiptomantami llujshirca. Jacobpaj huahua huahuacunaca ajeno llajtamantami llujshirca. Chai pachamantami,

² Judaca, Diospaj huasi tucurca. Israelca, pai mandana llajtami tucurca.

³ Mama cuchapish israelcunata ricushpaca, callpashpami anchurirca. Jordán yacupish huashamanmi tigrarca.

⁴ Urcucunapish carnerocuna shinami saltarcacuna. Lomacunapish malta ovejacuna shinami saltarcacuna.

⁵ Mama cuchalla, ¿ima tucushpataj miticushpa callparcanguiyari? Jordán yaculla, ¿ima tucushpataj huashaman tigrarcanguiyari?

⁶ Urcucunalla, ¿imamantataj carnerocuna shina saltarircanguichigari? Lomacunalla, cancunapish ¿imamantataj malta ovejacuna shina saltarircanguichigari?

⁷ Mandaj Diospaj ñaupajpica, allpaca chujchunmari. Jacobpaj Taita Diospaj ñaupajpimari chujchun.

⁸ Paimi rumi urcutaca yacu tanqueta rurarca. Paimi rumi c'aca quinripica yacuta pajchachirca.